வாஷிங்டன்: அமெரிக்க அதிபர் டொனால்ட் ட்ரம்ப், ஈரான் முன்வைத்த 7 நாள் போர் நிறுத்த முன்மொழிவை நிராகரித்துள்ளதாக தெரிவித்துள்ளார். இதையடுத்து, நவம்பர் மாதம் நடைபெறும் அமெரிக்க இடைக்காலத் தேர்தலுக்குப் பிறகு ஈரான் மீதான அமெரிக்க தாக்குதல்கள் மீண்டும் தொடங்கலாம் என்ற தகவல் வெளியாகியுள்ளது. 

ஈரான் முன்வைத்த திட்டத்தின்படி, அமெரிக்கா தனது கடற்படை முற்றுகையைத் தளர்த்துவதுடன், ஈரானின் எண்ணெய் ஏற்றுமதி மீதான சில தடைகளை நீக்க வேண்டும். அதற்குப் பதிலாக, ஹார்முஸ் நீரிணையை 7 நாட்களுக்குள் மீண்டும் திறப்பதும், அணுசக்தி தொடர்பான பேச்சுவார்த்தைகளைத் தொடங்குவதும் ஈரான் தரப்பில் முன்மொழியப்பட்டது. 

இந்த முன்மொழிவு தொடர்பாக ட்ரம்ப், ஈரான் முன்வைத்துள்ள நிபந்தனைகள் ஏற்கத்தக்கவை அல்ல என்று கூறியுள்ளார். ஈரான் தரப்பில், அமெரிக்காவின் அதிகாரப்பூர்வ பதில் இன்னும் மத்தியஸ்தர்கள் மூலம் கிடைக்கவில்லை என்றும், பேச்சுவார்த்தை மூலமே பிரச்சினைக்கு தீர்வு காண முடியும் என்றும் வெளியுறவு அமைச்சர் அப்பாஸ் அராக்சி தெரிவித்துள்ளார். 

இதற்கிடையில், நவம்பர் இடைக்காலத் தேர்தலுக்குப் பிறகு ஈரான் மீது மீண்டும் குண்டுவீச்சு நடத்தப்படலாம் என்று ட்ரம்ப் தனது ஆலோசகர்களிடம் தெரிவித்ததாக அமெரிக்க அதிகாரிகளை மேற்கோள் காட்டி Wall Street Journal செய்தி வெளியிட்டுள்ளது. எனினும், அமெரிக்காவின் அடுத்தகட்ட ராணுவ நடவடிக்கையின் அளவு மற்றும் காலக்கெடு குறித்து உறுதியான முடிவு வெளியாகவில்லை. 

ஹார்முஸ் நீரிணை உலகளாவிய எரிசக்தி வர்த்தகத்தில் முக்கியத்துவம் வாய்ந்த கடல்வழியாக இருப்பதால், அதன் போக்குவரத்து நிலைமை சர்வதேச எண்ணெய் சந்தையிலும் தாக்கத்தை ஏற்படுத்தக்கூடியதாக உள்ளது. இதனால், அமெரிக்கா மற்றும் ஈரான் இடையேயான அடுத்தகட்ட பேச்சுவார்த்தைகள் சர்வதேச அளவில் கவனிக்கப்பட்டு வருகின்றன.