கீவ்: உக்ரைன் மீதான ரஷ்யாவின் போரை முடிவுக்குக் கொண்டு வருவதற்காக அமெரிக்கா முன்மொழிந்துள்ள 28 அம்ச அமைதித் திட்டம் குறித்துத் தனது நாடு பரிசீலித்து வரும் நிலையில், உக்ரைன் அதிபர் வொலோதிமீர் ஸெலென்ஸ்கி தனது நாட்டின் வரலாற்றிலேயே இது மிகக் கடினமான தருணம் என்று நாட்டு மக்களுக்கு ஆற்றிய உரையில் தெரிவித்துள்ளார்.
மிகக் கடினமான தேர்வு
உக்ரைன் மீது மிகக் கடுமையான அழுத்தம் நிலவுவதாகவும், தற்போது உக்ரைன் மிகக் கடினமான ஒரு தேர்வை எதிர்கொள்ள வேண்டியிருக்கும் என்றும் திரு. ஸெலென்ஸ்கி கூறியுள்ளார்.
அத்தேர்வானது, "கௌரவத்தை இழப்பது அல்லது ஒரு முக்கியக் கூட்டாளியை இழக்கும் அபாயத்தை" எதிர்கொள்வது என அவர் குறிப்பிட்டுள்ளார்.
அமெரிக்காவின் இந்தச் சமாதானத் திட்டத்தில் திருத்தங்கள் கொண்டு வர மாற்று யோசனைகளை முன்வைக்கத் திட்டமிட்டுள்ளதால், அடுத்த வாரம் மிகவும் சவாலானதாகவும், நிகழ்வுகள் நிறைந்ததாகவும் இருக்கும் என்றும் அவர் தெரிவித்துள்ளார். இந்த ஆவணத்தில் உக்ரைனின் நலன்கள் கண்டிப்பாகக் கணக்கில் கொள்ளப்பட வேண்டும் என்று அவர் வலியுறுத்தியுள்ளார்.
சமாதான முயற்சி தொடரும்
தான் தரவுகளை முன்வைத்து, வலியுறுத்தி, மாற்று வழிகளை வழங்குவேன் என்று அதிபர் ஸெலென்ஸ்கி உறுதியளித்தார். உக்ரைன் சமாதானத்தை விரும்பவில்லை என்று எதிரிகள் கூறுவதற்கு எந்தக் காரணத்தையும் அளிக்க மாட்டேன் என்றும் அவர் அழுத்தம் திருத்தமாகக் கூறியுள்ளார்.
அமெரிக்காவின் நிலைப்பாடு
இதற்கிடையே, அமெரிக்கா முன்மொழிந்துள்ள இந்தச் சமாதானத் திட்டத்தில் உக்ரைன் பெரிய அளவில் சலுகைகளை வழங்க வேண்டியிருக்கும் என்ற கருத்துக்களை வெள்ளை மாளிகைச் செய்திச் செயலர் கரோலின் லீவிட் நிராகரித்தார்.
அமெரிக்கா இரு தரப்பினருடனும் சமமாக ஈடுபட்டுள்ளதாகவும், இந்தத் திட்டங்கள் உக்ரைன் தரப்பில் இருந்து பெரிய சமரசங்களைக் குறிக்கவில்லை என்றும் அவர் தெரிவித்துள்ளார்.
