நியூயார்க்: சண்டை நிறுத்தம் அமலில் இருந்தபோதிலும், காஸா மீது இஸ்ரேல் ராணுவம் மீண்டும் தாக்குதல்களை நடத்தியதற்கு ஐக்கிய நாடுகள் சபையின் (ஐ.நா.) பொதுச்செயலாளர் அன்டோனியோ குட்டரெஸ் அவர்கள் கடும் கண்டனம் தெரிவித்துள்ளார்.
தாக்குதலில் 90 பேர் உயிரிழப்பு:
போர் நிறுத்த ஒப்பந்தத்தை மீறி காஸா மீது இஸ்ரேல் ராணுவம் நடத்திய தாக்குதல்களில், 24 குழந்தைகள் உட்பட மொத்தம் 90 பேர் உயிரிழந்ததாகத் தகவல்கள் தெரிவிக்கின்றன. மேலும் பலர் காயமடைந்துள்ளனர். இந்தத் திடீர் வன்முறை அதிகரிப்பு அப்பகுதியில் பதற்றத்தை மேலும் அதிகரித்துள்ளது.
ரஃபாவில் துப்பாக்கிச் சண்டை:
காஸாவின் தெற்குப் பகுதியான ரஃபாவில் ஹமாஸ் போராளிகளுக்கும், இஸ்ரேல் ராணுவத்துக்கும் இடையே கடும் துப்பாக்கிச் சண்டை நடைபெற்றது. இந்தச் சண்டையின்போது இஸ்ரேல் வீரர் ஒருவர் கொல்லப்பட்டதாகக் கூறப்படுகிறது.
இதன் விளைவாக, பதிலடி கொடுக்கும் விதமாக இஸ்ரேல் ராணுவம் இரவு முழுவதும் காஸாவின் பல்வேறு இலக்குகள் மீது குண்டுகளை வீசித் தாக்குதல் நடத்தியுள்ளது.
ஐ.நா. பொதுச்செயலாளர் வலியுறுத்தல்:
போர் நிறுத்த ஒப்பந்தம் மீறப்பட்டதற்கும், அப்பாவி மக்கள் உயிரிழந்ததற்கும் ஐ.நா. பொதுச்செயலாளர் அன்டோனியோ குட்டரெஸ் தனது ஆழ்ந்த வருத்தத்தையும் கண்டனத்தையும் பதிவு செய்துள்ளார். இந்தப் பிராந்தியத்தில் அமைதி திரும்புவதற்கும், பொதுமக்களின் பாதுகாப்பை உறுதி செய்வதற்கும் அனைத்துத் தரப்பினரும் உடனடியாகப் போர் நிறுத்த ஒப்பந்தத்தை முழுமையாகக் கடைப்பிடிக்க வேண்டும் என்று அவர் வலுயுறுத்தியுள்ளார்.
