வாஷிங்டன்: அமெரிக்காவின் அரிசோனா மாகாணத்தில் நிலப்பரப்பிற்கு மேலே பறந்து கொண்டிருந்த இரண்டு ஹெலிகாப்டர்கள் எதிர்பாராதவிதமாக நடுவானில் மோதி விபத்துக்குள்ளாகின. இந்த விபத்தில் ஒரு ஹெலிகாப்டரின் விமானி உயிரிழந்தார்.
விபத்து நடந்தது எப்படி?
அரிசோனா மாகாணத்தின் சான்ட்லர் நகரில் உள்ள விமான நிலையத்திற்கு அருகாமையில் இந்த விபத்து நிகழ்ந்துள்ளது.
ஒரு ஹெலிகாப்டர் பயிற்சிப் பயணத்தில் இருந்தபோது, மற்றொரு ஹெலிகாப்டர் அதன் அருகே வந்துள்ளது.
எதிர்பாராத நேரத்தில் இரண்டு ஹெலிகாப்டர்களின் இறக்கைகளும் மோதிக்கொண்டன.
மோதிய வேகத்தில் ஒரு ஹெலிகாப்டர் கட்டுப்பாட்டை இழந்து தீப்பிடித்தபடி கீழே விழுந்து நொறுங்கியது.
உயிரிழப்பு மற்றும் மீட்புப்பணி
கீழே விழுந்து நொறுங்கிய ஹெலிகாப்டரில் இருந்த விமானி சம்பவ இடத்திலேயே உயிரிழந்ததாகத் தகவல்கள் தெரிவிக்கின்றன. மற்றொரு ஹெலிகாப்டர் பலத்த சேதமடைந்த போதிலும், அதன் விமானி சாமர்த்தியமாகச் செயல்பட்டு அருகிலுள்ள வயல்வெளியில் ஹெலிகாப்டரை அவசரமாகத் தரையிறக்கினார். அந்த ஹெலிகாப்டரில் இருந்தவர்கள் லேசான காயங்களுடன் உயிர் தப்பினர்.
விசாரணை தீவிரம்
இந்த விபத்து குறித்து அமெரிக்காவின் தேசிய போக்குவரத்து பாதுகாப்பு வாரியம் மற்றும் கூட்டாட்சி விமான போக்குவரத்து நிர்வாகம் ஆகியவை தீவிர விசாரணை மேற்கொண்டு வருகின்றன.
விமானிகள் மற்றும் கட்டுப்பாட்டு அறைக்கு இடையிலான உரையாடல்கள் ஆய்வு செய்யப்பட்டு வருகின்றன.
தொழில்நுட்பக் கோளாறு காரணமா அல்லது மனிதத் தவறால் இந்த விபத்து நேரிட்டதா என்பது குறித்து விசாரிக்கப்பட்டு வருகிறது.
சமீபகாலமாக அமெரிக்காவில் சிறிய ரக விமானங்கள் மற்றும் ஹெலிகாப்டர் விபத்துகள் அதிகரித்து வருவது அந்நாட்டு விமானப் போக்குவரத்துத் துறையினரிடையே கவலையை ஏற்படுத்தியுள்ளது.
