தமிழக முதலமைச்சர் மு.க. ஸ்டாலின் அவர்கள், தமிழக அரசின் திட்டப்பணிகள் மற்றும் வளர்ச்சித் திட்டங்களின் முன்னேற்றம் குறித்து கள ஆய்வு செய்வதற்காக இன்று (அக்டோபர் 3) ராமநாதபுரம் மாவட்டத்தில் சுற்றுப்பயணம் மேற்கொள்கிறார்.
மதுரையில் உற்சாக வரவேற்பு:
இதற்காக, முதலமைச்சர் மு.க. ஸ்டாலின் நேற்று மாலை சென்னையில் இருந்து விமானம் மூலம் மதுரை சென்றடைந்தார். மதுரை விமான நிலையத்தில் அவருக்கு அமைச்சர்கள், சட்டமன்ற உறுப்பினர்கள் மற்றும் கழகத் தொண்டர்கள் உற்சாகமான வரவேற்பு அளித்தனர்.
ஆய்வு விவரம்:
ராமநாதபுரத்தில் இன்று நடைபெறும் இந்த 'கள ஆய்வில் முதலமைச்சர்' திட்டத்தின் கீழ், மாவட்ட ஆட்சியர் மற்றும் அரசு அதிகாரிகளுடன் முதலமைச்சர் மு.க. ஸ்டாலின் ஆலோசனை நடத்துகிறார்.
மாவட்டத்தில் நிறைவுற்ற மற்றும் தற்போது நடைபெற்று வரும் வளர்ச்சித் திட்டப் பணிகளின் தற்போதைய நிலை குறித்து அவர் விரிவான ஆய்வு மேற்கொள்கிறார்.
மேலும், ராமநாதபுரம் அருகே புல்லங்குடி பகுதியில் நடைபெறும் பிரம்மாண்ட அரசு விழாவில் பங்கேற்கும் முதலமைச்சர், பல கோடி ரூபாய் மதிப்பிலான புதிய திட்டப் பணிகளுக்கு அடிக்கல் நாட்டி, முடிவுற்ற பணிகளைத் தொடங்கி வைக்கிறார்.
இதையும் படிக்க: பருவமழை முன்னேற்பாடுகள்: டெல்டா மாவட்ட ஆட்சியர்களுடன் முதலமைச்சர் மு.க.ஸ்டாலின் ஆலோசனை
குறிப்பாக, ரூ. 20 கோடி செலவில் புதிதாகக் கட்டப்பட்டுள்ள பேருந்து நிலையத்தை அவர் இன்று திறந்து வைக்க உள்ளதாகத் தகவல்கள் தெரிவிக்கின்றன.
அதைத் தொடர்ந்து, பயனாளிகளுக்கு நலத்திட்ட உதவிகளை வழங்கிவிட்டு, முதலமைச்சர் இன்று மாலை சென்னை திரும்புகிறார்.
