சென்னை: சென்னையின் போக்குவரத்து வசதியை மேம்படுத்தும் வகையில், பூந்தமல்லி - வடபழனி இடையிலான புதிய மெட்ரோ ரயில் சேவையைப் பிரதமர் நரேந்திர மோடி இன்று தொடங்கி வைத்தார். சென்னை மெட்ரோ ரயில் திட்டத்தின் இரண்டாம் கட்டத்தில் முக்கியப் பகுதியாக அமைந்துள்ள இந்த வழித்தடம், மேற்கு சென்னை மக்களின் பயண வசதியை மேம்படுத்தும் என எதிர்பார்க்கப்படுகிறது.
ரூ.4,900 கோடி செலவில் புதிய வழித்தடம்
சுமார் 14.6 கிலோமீட்டர் நீளமுள்ள இந்த வழித்தடம், ஏறத்தாழ ரூ.4,900 கோடி செலவில் உருவாக்கப்பட்டுள்ளது. இதில் முதற்கட்டமாக 11 உயர்மட்ட மெட்ரோ ரயில் நிலையங்களில் பயணிகள் சேவை தொடங்குகிறது.
பூந்தமல்லி புறவழிச்சாலை, பேருந்து நிலையம், அரசு மருத்துவமனை, கரையான்சாவடி, குமணன் சாவடி, காட்டுப்பாக்கம், அய்யப்பன்தாங்கல், தெள்ளியாரகரம், போரூர் புறவழிச்சாலை, போரூர் சந்திப்பு மற்றும் வடபழனி ஆகிய நிலையங்கள் இந்த வழித்தடத்தில் இடம்பெற்றுள்ளன.
பொதுமக்களுக்கான சேவை நேரம்
தொடக்க நாளான இன்று மாலை 4 மணி முதல் இரவு 9 மணி வரை மெட்ரோ ரயில்கள் இயக்கப்படும். அக்டோபர் 12 முதல் காலை 7 மணி முதல் இரவு 9 மணி வரை வழக்கமான சேவை வழங்கப்படும் என அறிவிக்கப்பட்டுள்ளது.
இந்தப் புதிய வழித்தடம் பயன்பாட்டுக்கு வருவதன் மூலம் பூந்தமல்லி, போரூர் மற்றும் வடபழனி பகுதிகளுக்கு இடையிலான இணைப்பு மேம்படும். சாலைப் போக்குவரத்து நெரிசலைக் குறைக்கவும், பயண நேரத்தைச் சேமிக்கவும் இந்தத் திட்டம் உதவும் என எதிர்பார்க்கப்படுகிறது.
