சென்னை: தமிழக முதல்வர் விஜய் செப்டம்பர் 10ஆம் தேதி லண்டன் செல்ல திட்டமிட்டிருந்த நிலையில், அவரது வெளிநாட்டு பயணம் ஒத்திவைக்கப்படலாம் என்ற புதிய தகவல் வெளியாகியுள்ளது. மலேசிய பிரதமர் அன்வர் இப்ராஹிம் சென்னை வர உள்ள நிலையில், அவரை சந்திப்பதற்காக விஜய்யின் பயணத் திட்டத்தில் மாற்றம் ஏற்பட வாய்ப்புள்ளதாக கூறப்படுகிறது.

முதல்வராக பொறுப்பேற்ற பிறகு விஜய் மேற்கொள்ளும் முதல் வெளிநாட்டு பயணமாக இந்த லண்டன் சுற்றுப்பயணம் திட்டமிடப்பட்டிருந்தது. செப்டம்பர் 10 முதல் 16ஆம் தேதி வரை நடைபெறவிருந்த பயணத்தில், தமிழகத்திற்கு புதிய தொழில் முதலீடுகளை ஈர்ப்பது தொடர்பாக முதலீட்டாளர்கள் மற்றும் தொழிலதிபர்களை சந்திக்க திட்டமிடப்பட்டிருந்ததாக தகவல்கள் தெரிவிக்கின்றன.

இதற்கிடையில், டெல்லியில் நடைபெறும் பிரிக்ஸ் உச்சிமாநாட்டில் பங்கேற்கும் மலேசிய பிரதமர் அன்வர் இப்ராஹிம், மாநாட்டுக்குப் பிறகு சென்னை வர உள்ளதாக தகவல் வெளியாகியுள்ளது. இந்தச் சந்திப்பை கருத்தில் கொண்டு, விஜய் தனது லண்டன் பயணத்தை தள்ளிவைக்க வாய்ப்புள்ளதாக அதிகாரப்பூர்வ வட்டாரங்களை மேற்கோள்காட்டி செய்திகள் தெரிவிக்கின்றன.

மேலும், தமிழகத்தில் இரண்டு தொகுதிகளுக்கான இடைத்தேர்தல் பணிகளும் தொடங்க உள்ள நிலையில், முதல்வர் விஜய் மாநிலத்திலேயே இருந்து தேர்தல் நடவடிக்கைகளில் கவனம் செலுத்த வேண்டிய சூழலும் ஏற்பட்டுள்ளதாக தகவல்கள் வெளியாகியுள்ளன.

எனினும், லண்டன் பயணம் முழுமையாக ரத்து செய்யப்பட்டதா அல்லது பின்னர் புதிய தேதியில் மேற்கொள்ளப்படுமா என்பது குறித்து இறுதி அதிகாரப்பூர்வ அறிவிப்பு வெளியாகவில்லை. இதனால் முதல்வர் விஜய்யின் வெளிநாட்டு பயண அட்டவணை குறித்து எதிர்பார்ப்பு நீடிக்கிறது.