சென்னை: தமிழகத்திற்கு புதிய முதலீடுகளை ஈர்க்கும் நோக்கில் முதல்-அமைச்சர் விஜய் செப்டம்பர் 10-ம் தேதி பிரிட்டனுக்கு பயணம் மேற்கொள்ள உள்ளதாக தகவல் வெளியாகியுள்ளது. இந்தப் பயணத்தின்போது சர்வதேச முதலீட்டாளர்கள் மற்றும் தொழில் நிறுவனங்களின் பிரதிநிதிகளை சந்தித்து, தமிழகத்தில் முதலீடு செய்வதற்கான வாய்ப்புகள் குறித்து ஆலோசனை நடத்த உள்ளதாக கூறப்படுகிறது.
தமிழகத்தில் தொழில் வளர்ச்சி மற்றும் வேலைவாய்ப்புகளை அதிகரிக்கும் வகையில் பல்வேறு துறைகளில் முதலீடுகளை ஈர்ப்பதற்கான நடவடிக்கைகள் மேற்கொள்ளப்பட்டு வருகின்றன. குறிப்பாக, வெளிநாட்டு முதலீடுகளை தமிழகத்திற்கு கொண்டு வருவதில் அரசு கவனம் செலுத்தி வருவதாக தெரிவிக்கப்பட்டுள்ளது.
இந்தச் சூழலில் முதல்வர் விஜய்யின் பிரிட்டன் பயணம் முக்கியத்துவம் பெற்றுள்ளது. அங்கு தகவல் தொழில்நுட்பம், உற்பத்தி, மின்சார வாகனங்கள், புதுப்பிக்கத்தக்க எரிசக்தி உள்ளிட்ட துறைகளில் செயல்படும் நிறுவனங்களுடன் முதலீட்டு வாய்ப்புகள் தொடர்பாக பேச்சுவார்த்தை நடத்தப்படலாம் என எதிர்பார்க்கப்படுகிறது.
மேலும், தமிழகத்தின் தொழில் கட்டமைப்பு, திறமையான மனிதவளம், துறைவாரியான முதலீட்டு வாய்ப்புகள் மற்றும் அரசின் தொழில் கொள்கைகள் குறித்து முதலீட்டாளர்களிடம் எடுத்துரைக்கப்பட உள்ளதாக கூறப்படுகிறது.
பிரிட்டன் பயணத்தின்போது தமிழகத்தில் புதிய தொழில் நிறுவனங்களை தொடங்குவதற்கான புரிந்துணர்வு ஒப்பந்தங்கள் கையெழுத்தாகுமா என்ற எதிர்பார்ப்பும் ஏற்பட்டுள்ளது. இதன் மூலம் புதிய முதலீடுகள் கிடைப்பதுடன், வேலைவாய்ப்புகளும் அதிகரிக்க வாய்ப்புள்ளதாக தொழில் வட்டாரங்கள் கருதுகின்றன.
செப்டம்பர் 10-ம் தேதி தொடங்க உள்ளதாக கூறப்படும் முதல்வர் விஜய்யின் பிரிட்டன் பயணம், தமிழகத்தின் வெளிநாட்டு முதலீட்டு முயற்சிகளில் அடுத்தகட்ட நடவடிக்கையாக பார்க்கப்படுகிறது.
