தமிழகத்தில் போதைப்பொருள் ஒழிப்பு நடவடிக்கைகள் தொடர்பாக சட்டப்பேரவையில் திமுக மற்றும் தவெக இடையே இன்று கடும் விவாதம் நடைபெற்றது. கோவை மாணவர் அமுதன் கொலை உள்ளிட்ட சம்பவங்களை முன்வைத்து எதிர்க்கட்சித் தலைவர் உதயநிதி ஸ்டாலின் அரசிடம் கேள்விகளை எழுப்பிய நிலையில், திமுக ஆட்சிக் காலத்தில் போதைப்பொருள் கட்டுப்பாட்டில் போதிய நடவடிக்கை எடுக்கப்படவில்லை என தவெக அமைச்சர்கள் குற்றம்சாட்டினர்.

கோவை கல்லூரி மாணவர் அமுதன் கொலை தொடர்பான கவன ஈர்ப்பு தீர்மானத்தின் மீதான விவாதத்தில் போதைப்பொருள் விவகாரமும் முக்கியமாக எழுந்தது. அமுதன் கொலைக்கு போதைப்பொருள் காரணம் என கூறப்படுவதை அரசு தரப்பு மறுத்து, இரு மாணவர் குழுக்களுக்கு இடையேயான முன்விரோதமே சம்பவத்துக்கு காரணம் என விளக்கம் அளித்தது. இந்த வழக்கில் 15 பேர் கைது செய்யப்பட்டுள்ளதாகவும் தெரிவிக்கப்பட்டது.

திமுக ஆட்சியில் போதைப்பொருள் புழக்கம் அதிகரித்ததாக தவெக தரப்பில் குற்றச்சாட்டு முன்வைக்கப்பட்டது. சர்வதேச போதைப்பொருள் கடத்தல் தொடர்பாக கைது செய்யப்பட்ட ஜாபர் சாதிக் விவகாரத்தையும் ஆளும் தரப்பு சுட்டிக்காட்டியது. இதற்கு பதிலளித்த உதயநிதி ஸ்டாலின், குற்றச்சாட்டு எழுந்தவுடன் சம்பந்தப்பட்ட நபர் கட்சியில் இருந்து நீக்கப்பட்டு கைது செய்யப்பட்டதாக தெரிவித்தார்.

மேலும், தற்போதைய ஆட்சியில் போதைப்பொருள் ஒழிப்புக்காக மேற்கொள்ளப்படும் நடவடிக்கைகள் குறித்தும் உதயநிதி கேள்வி எழுப்பினார். இதற்கு பதிலளித்த அமைச்சர் ஆதவ் அர்ஜூனா, போதைப்பொருள் ஒழிப்புக்காக தவெக அரசு ரூ.264 கோடி ஒதுக்கியுள்ளதாக தெரிவித்தார்.

தொடர்ந்து நடைபெற்ற வாக்குவாதத்தில், திமுக ஆட்சியில் போதைப்பொருள் தடுப்பு நடவடிக்கையில் பணியாற்றிய அதிகாரிகளுக்கே தற்போதைய அரசு முக்கிய பொறுப்புகளை வழங்கியுள்ளதாக உதயநிதி குறிப்பிட்டார். இதற்கு தவெக தரப்பில் திமுக ஆட்சிக் காலத்தில் குற்றச்சம்பவங்கள் மற்றும் போதைப்பொருள் கட்டுப்பாடு தொடர்பாக எதிர்க்கேள்விகள் முன்வைக்கப்பட்டன.

விவாதம் தொடர்ந்து தீவிரமடைந்த நிலையில், திமுக உறுப்பினர்கள் அரசின் பதிலில் தெளிவு இல்லை எனக் கூறி வெளிநடப்பு செய்தனர். இந்த விவகாரம் தமிழக சட்டப்பேரவையில் ஆளும் கட்சி மற்றும் எதிர்க்கட்சிக்கு இடையேயான அரசியல் மோதலை மேலும் தீவிரப்படுத்தியுள்ளது.