பிரபல நட்சத்திரத் தம்பதிகளான சூர்யா மற்றும் ஜோதிகாவின் மகள் தியா சூர்யா, திரையுலகில் இயக்குநராக அறிமுகமாகி உள்ளார். 17 வயதே ஆன தியா இயக்கிய முதல் ஆவணக் குறும்படமே, அமெரிக்காவில் 'ஆஸ்கர் தகுதிப் பெறுவதற்கான திரையிடலில்' (Oscar Qualifying Run) இடம்பெற்று, திரையுலகினரின் கவனத்தை ஈர்த்துள்ளது.
ஆவணக் குறும்படத்தின் பெயர் என்ன?
தியா சூர்யா இயக்கியுள்ள இந்தப் படம் ஒரு ஆவண நாடகம் (Docu-drama) ஆகும். இதன் பெயர் 'லீடிங் லைட்' (Leading Light).
படத்தின் கதை என்ன?
இந்தியத் திரையுலகில், குறிப்பாக பாலிவுட்டில், தொழில்நுட்பக் கலைஞர்களாகப் பணியாற்றும் 'லைட் வுமன்' (Lighting Women) எனப்படும் பெண் காஃபர்களின் (Gaffers) சொல்லப்படாத கதைகளை இந்தக் குறும்படம் பேசுகிறது. ஒரு திரைப்படத் தயாரிப்பில் லைட்டிங் துறையில் பணிபுரியும் பெண்களின் சவால்கள், போராட்டங்கள் மற்றும் அவர்களின் உறுதியைக் காட்சிப்படுத்துவதே இதன் கருப்பொருள்.
ஆஸ்கர் தகுதிப் பெறுவதற்கான திரையிடல்:
தியா சூர்யாவின் அறிமுகப் படமான 'லீடிங் லைட்' குறும்படம், தற்போது அமெரிக்காவின் லாஸ் ஏஞ்சல்ஸ் நகரில் உள்ள ரீஜென்சி திரையரங்கில் (Regency Theatre) ஆஸ்கர் விருதுக்குத் தகுதி பெறுவதற்கான திரையிடலுக்கு (Oscar Qualifying Run) தேர்வாகியுள்ளது. செப்டம்பர் 26 முதல் அக்டோபர் 2 ஆம் தேதி வரை ஒரு வாரம் இத்திரைப்படம் அங்கு திரையிடப்படுகிறது.
இதையும் படிக்க: இளையராஜாவுக்கு உத்தரவிட்ட நீதிமன்றம்.. என்ன தெரியுமா..?
இந்த திரையிடல் மூலம், இப்படம் 2026 ஆம் ஆண்டுக்கான ஆஸ்கர் விருதுகளில் சிறந்த ஆவணக் குறும்படம் (Best Documentary Short) பிரிவில் பரிசீலனை செய்யத் தகுதிபெறும்.
இந்த குறும்படத்தை தியாவின் பெற்றோர்களான சூர்யா மற்றும் ஜோதிகா அவர்களின் 2D எண்டர்டெயின்மெண்ட் (2D Entertainment) நிறுவனம் தயாரித்துள்ளது.
அறிமுக இயக்கத்திலேயே தியா சூர்யாவின் படைப்பு சர்வதேச அரங்கில் கவனத்தை ஈர்த்திருப்பது, திரைத்துறையில் அவரது எதிர்கால பங்களிப்புக்கான நம்பிக்கையை அதிகரித்துள்ளது. திரையுலகைச் சேர்ந்த பலரும் தியாவுக்கு வாழ்த்துகளைத் தெரிவித்து வருகின்றனர்.
