கோவை: நீலகிரி (ஊட்டி) மற்றும் திண்டுக்கல்லை (கொடைக்கானல்) தொடர்ந்து, கோவை மாவட்டத்தில் உள்ள வால்பாறை மலைப் பகுதிக்கும் இன்று (நவம்பர் 1) முதல் இ-பாஸ் (e-Pass) நடைமுறை கட்டாயமாக்கப்பட்டுள்ளது.
உத்தரவும் நோக்கமும்:
வால்பாறையின் சுற்றுச்சூழல் பாதுகாப்பு, வனவிலங்குகளின் பாதுகாப்பு மற்றும் சுற்றுலாப் பயணிகளின் வாகன நெரிசலைக் கட்டுப்படுத்தும் நோக்கில் இந்த இ-பாஸ் நடைமுறை அமல்படுத்தப்பட்டுள்ளது. இது சென்னை உயர் நீதிமன்றத்தின் உத்தரவுப்படி எடுக்கப்பட்ட நடவடிக்கையாகும்.
சுற்றுலாப் பயணிகள் தங்கள் வாகனங்களுக்கு தமிழக அரசின் அதிகாரப்பூர்வ இணையதளமான https://www.tnepass.tn.gov.in/home வாயிலாக விண்ணப்பித்து இ-பாஸ் பெறலாம். ஆழியார் மற்றும் சோலையார் ஆகிய இரண்டு சோதனைச் சாவடிகளிலும் இ-பாஸ் சரிபார்க்கப்படும்.
வால்பாறை தாலுகாவில் வசிக்கும் உள்ளூர் மக்கள் ஒருமுறை மட்டும் பதிவு செய்து "Localite Pass" பெற்றால் போதுமானது என்று மாவட்ட நிர்வாகம் அறிவித்துள்ளது. மேலும், வால்பாறைக்குள் தடை செய்யப்பட்ட பிளாஸ்டிக் பொருட்களை எடுத்து வரவோ, பயன்படுத்தவோ கூடாது என்றும் எச்சரிக்கப்பட்டுள்ளது.
