சென்னை/கரூர்: கரூர் பரப்புரைக் கூட்ட நெரிசல் துயரச் சம்பவத்தில் உயிரிழந்தவர்களின் குடும்பங்களை நேரில் சந்தித்து ஆறுதல் கூற, தமிழ்நாடு வெற்றி கழகத் (தவெக) தலைவர் விஜய் முடிவெடுத்துள்ளார். இதற்காக, அவரது வருகை மற்றும் பயணத்தின்போது பாதுகாப்பு ஏற்பாடுகள் செய்யக் கோரி, தவெக சார்பில் காவல்துறை தலைமை இயக்குநர் (டிஜிபி) அலுவலகத்தில் அதிகாரப்பூர்வமாக மனு அளிக்கப்பட்டுள்ளது.
நடைபெற்றது என்ன?
கடந்த செப்டம்பர் 27-ஆம் தேதி கரூரில் நடைபெற்ற தவெக தலைவர் விஜயின் பரப்புரையின்போது ஏற்பட்ட கூட்ட நெரிசலில் சிக்கி 41 பேர் உயிரிழந்தது தமிழகம் முழுவதும் பெரும் சோகத்தை ஏற்படுத்தியது. துயர சம்பவத்தைத் தொடர்ந்து, தமிழக அரசு உயிரிழந்தோர் குடும்பங்களுக்கு தலா ரூ. 10 லட்சம் நிவாரண உதவி அறிவித்தது.
விஜயின் பயணம் மற்றும் பாதுகாப்பு கோரிக்கை:
தவெக பொதுச் செயலாளர் (கொள்கை மற்றும் பிரச்சாரம்) கே.ஜி. அருண்ராஜ் மூலமாக, விஜய் தனது பயணத்திற்கான அனுமதியை கோரியுள்ளார். கரூர் சம்பவத்தில் உயிரிழந்த 41 பேரின் குடும்பங்களைச் சந்தித்து ஆறுதல் கூறுவதே விஜயின் முக்கிய நோக்கம் என்றும், இது ஒரு தனிப்பட்ட, மரியாதையான நிகழ்ச்சி என்றும் மனுவில் குறிப்பிடப்பட்டுள்ளது. எந்தவித பொதுக் கூட்டமோ அல்லது வாகனப் பேரணியோ நடத்தப்பட மாட்டாது என்றும், உயிரிழந்தவர்களின் வீடுகளில் மட்டுமே அவர் சந்திப்பு நடத்துவார் என்றும் தவெக உறுதி அளித்துள்ளது.
விஜய் ஒய்-பிரிவு பாதுகாப்பு பிரிவின்கீழ் இருப்பவர் என்பதால், அவரது வருகையின்போது எந்தவித அசம்பாவிதமும் நிகழாமல் இருக்கத் தகுந்த பாதுகாப்பு ஏற்பாடுகள் செய்யப்பட வேண்டும் என்று மனுவில் கோரப்பட்டுள்ளது. பாதிக்கப்பட்ட குடும்பங்களுக்குத் தவெக சார்பில் அறிவிக்கப்பட்ட நிவாரணத் தொகையையும் அப்போது வழங்க உள்ளார். விஜயின் கரூர் பயணம் குறித்த தேதி இன்னும் உறுதி செய்யப்படாத நிலையில், பாதுகாப்பு அனுமதியை எதிர்பார்த்து தவெக நிர்வாகிகள் காத்திருக்கின்றனர். முன்னதாக, விஜய் வீடியோ கால் மூலம் பாதிக்கப்பட்ட 30-க்கும் மேற்பட்ட குடும்பங்களுடன் பேசியது குறிப்பிடத்தக்கது.
