கரூர் அருகே கடந்த செப்டம்பர் 27-ஆம் தேதி தமிழக வெற்றிக் கழகத் தலைவர் விஜய் கலந்துகொண்ட பரப்புரைக் கூட்டத்தில் ஏற்பட்ட நெரிசலில் சிக்கி 41 பேர் உயிரிழந்த சம்பவம் தொடர்பாக, பாஜக தலைமையிலான உண்மை கண்டறியும் குழு அளித்த அறிக்கையில், இந்தக் கோரச் சம்பவத்துக்கு அரசு நிர்வாகத்தின் அலட்சியமே காரணம் என்று குற்றம் சாட்டப்பட்டுள்ளதாகத் தகவல் வெளியாகியுள்ளது.
ஹேமமாலினி தலைமையிலான குழு:
இந்தத் துயரச் சம்பவம் தொடர்பாக விசாரணை நடத்துவதற்காக, பாஜக தேசியத் தலைவர் ஜெ.பி. நட்டா உத்தரவின் பேரில், மக்களவை உறுப்பினரும் நடிகையுமான ஹேமமாலினி தலைமையில் எட்டு பேர் கொண்ட தேசிய ஜனநாயகக் கூட்டணியின் (NDA) உண்மை கண்டறியும் குழு அமைக்கப்பட்டது.
இக்குழுவில் பாஜகவின் அனுராக் தாக்கூர், தேஜஸ்வி சூர்யா, பிரிஜ் லால் உள்ளிட்டோர் அங்கம் வகித்தனர். இந்தக் குழுவினர் கரூர் சென்று, சம்பவம் நடந்த இடத்தை நேரில் ஆய்வு செய்ததுடன், பாதிக்கப்பட்ட குடும்பங்கள் மற்றும் காயமடைந்தவர்களைச் சந்தித்து விவரங்களைக் கேட்டறிந்தனர்.
அறிக்கையின் முக்கியப் பரிந்துரை:
விசாரணையை முடித்த பின், ஹேமமாலினி தலைமையிலான குழு தனது அறிக்கையை பாஜக தேசியத் தலைவர் ஜெ.பி. நட்டாவிடம் சமர்ப்பித்துள்ளது.
அந்த அறிக்கையின் முக்கியப் பரிந்துரையாக, "கரூர் கூட்ட நெரிசலுக்கு, கூட்டம் நடந்த இடத்தின் பொருத்தமற்ற அனுமதி, போதுமான கூட்டக் கட்டுப்பாட்டு நடவடிக்கைகளை மேற்கொள்ளாதது, மற்றும் விஜய்யின் வருகைத் தாமதத்தால் ஏற்பட்ட நெருக்கடியைக் கையாளத் தவறியது போன்ற அரசு நிர்வாகத்தின் அலட்சியமே பிரதான காரணம். எனவே, இந்தக் குறைபாடுகளுக்குக் காரணமான சம்பந்தப்பட்ட அதிகாரிகள் மீது உரிய துறை ரீதியான மற்றும் சட்டரீதியான நடவடிக்கை எடுக்கப்பட வேண்டும்" என்று பரிந்துரைத்துள்ளதாகத் தகவல்கள் தெரிவிக்கின்றன.
மேலும், இந்தச் சம்பவம் குறித்து உச்ச நீதிமன்ற நீதிபதி மேற்பார்வையில் சுதந்திரமான நீதி விசாரணை நடத்தப்பட வேண்டும் என்றும் அந்தக் குழு வலியுறுத்தியுள்ளதாகக் கூறப்படுகிறது. இந்தக் குழுவின் அறிக்கை, கரூர் துயரத்தைச் சுற்றியுள்ள அரசியல் சர்ச்சையை மேலும் அதிகரித்துள்ளது.
