கரூர் பொதுக்கூட்டத்தில் ஏற்பட்ட கூட்ட நெரிசல் விவகாரத்தில், தமிழ்நாடு வெற்றி கழகத்தின் (தவெக) தலைவர் விஜய்யை கைது செய்ய வேண்டிய சூழல் ஏற்பட்டால், நிச்சயம் கைது செய்வோம் என்று நீர்வளத்துறை அமைச்சர் துரைமுருகன் எச்சரிக்கை விடுத்துள்ளார். அவரது இந்தக் கருத்து, மாநில அரசியலில் பெரும் பரபரப்பை ஏற்படுத்தியுள்ளது.
விஜய் பிரச்சாரத்தில் ஏற்பட்ட விபத்து
தவெக தலைவர் விஜய், கடந்த செப்டம்பர் 27-ஆம் தேதி கரூரில் பிரச்சாரம் மேற்கொண்டார். அப்போது ஏற்பட்ட கடுமையான கூட்ட நெரிசலில் சிக்கி 41 பேர் பரிதாபமாக உயிரிழந்தனர். இந்தச் சம்பவம் மாநிலம் முழுவதும் பெரும் அதிர்ச்சியையும், சோகத்தையும் ஏற்படுத்தியது.
உயர் நீதிமன்றம் எழுப்பிய கேள்விகள்
இந்த விபத்து தொடர்பாக தவெக பொதுச் செயலாளர் என். ஆனந்த், இணைப் பொதுச் செயலாளர் நிர்மல் குமார் உள்ளிட்டோர் மீது ஐந்து பிரிவுகளின் கீழ் வழக்கு பதிவு செய்யப்பட்டது.
இந்நிலையில், கரூர் கூட்ட நெரிசல் விவகாரம் தொடர்பாகச் சென்னை உயர்நீதிமன்றம் விஜய்யையும், அவரது கட்சியினரையும் நோக்கிப் பல சரமாரியான கேள்விகளை எழுப்பியது. விபத்து நடந்த பின்னர், கட்சித் தலைவர் விஜய் நேரில் கரூர் சென்று பாதிக்கப்பட்டவர்களைச் சந்திக்காதது சமூக வலைதளங்களிலும், அரசியல் வட்டாரங்களிலும் கடும் விமர்சனத்தை ஏற்படுத்தியது.
விபத்து தொடர்பாக வழக்குகள் பதிவு செய்யப்பட்டு, தவெக-வின் கரூர் மாவட்ட நிர்வாகிகள் இருவர் கைது செய்யப்பட்டுள்ள நிலையில், அமைச்சரின் இந்தப் பகிரங்க எச்சரிக்கை, இந்த விவகாரம் அடுத்த கட்டத்தை நோக்கி நகர்வதற்கான அறிகுறியாகப் பார்க்கப்படுகிறது. கூட்ட நெரிசலுக்குக் காரணமானவர்கள் மீது சட்டப்படி கடும் நடவடிக்கை எடுக்கப்படும் என்பதை ஆளும் தரப்பு உறுதிப்படுத்துவதாக அரசியல் நோக்கர்கள் கருதுகின்றனர்.
