கரூர் மாவட்டத்தில் நடைபெற்ற தமிழக வெற்றிக் கழகத்தின் (த.வெ.க.) தேர்தல் பிரச்சாரக் கூட்டத்தில் ஏற்பட்ட கூட்ட நெரிசல் காரணமாக இதுவரை 41 பேர் உயிரிழந்த துயரச் சம்பவம், தமிழகம் முழுவதும் சோகத்தை ஏற்படுத்தியுள்ளது. இந்தச் சம்பவம் குறித்து, த.வெ.க. தலைவரும் நடிகருமான விஜய், நேற்று (செப்டம்பர் 29) இரவு உருக்கமான வீடியோ பதிவு ஒன்றை வெளியிட்டார்.
அந்த வீடியோவில், உயிரிழந்தவர்களின் குடும்பங்களுக்குத் தனது ஆழ்ந்த இரங்கலைத் தெரிவித்த அவர், நெரிசல் சம்பவத்தால் தான் அடைந்திருக்கும் வேதனையை வெளிப்படுத்தினார்.
— TVK Vijay (@TVKVijayHQ) September 30, 2025
விஜய்யின் உருக்கமான பேச்சு:
"என் நெஞ்சில் வாழும் அன்புச் சொந்தங்களே... கரூரில் நடந்த நிகழ்வை நினைத்து, எனது இதயமும் மனமும் கனத்துப்போயுள்ளன. என் வாழ்க்கையில் இதுபோன்ற ஒரு சூழ்நிலையை நான் சந்தித்ததில்லை." என அவர் தனது உரையைத் தொடங்கினார்.
மேலும், "நடக்கக்கூடாத ஒரு துயரமான சம்பவம் நடந்துவிட்டது. உயிரிழந்த அன்புச் சொந்தங்களை இழந்து வாடும் உங்களின் துயரச் சுமையின் மத்தியில், என் மனதில் உள்ள வலியைச் சொல்ல வார்த்தைகளே இல்லை. மனது முழுக்க வலி" என்று கண்ணீருடன் குறிப்பிட்டார்.
மருத்துவமனையில் சிகிச்சை பெற்று வருபவர்கள் விரைந்து குணமடைய இறைவனை வேண்டி நிற்பதாகவும், உயிரிழந்தவர்களின் குடும்பங்களுக்குத் த.வெ.க. சார்பில் உரிய நிவாரணமும், ஆதரவும் வழங்கப்படும் என்றும் விஜய் உறுதியளித்தார்.
கரூர் நெரிசல் சம்பவத்தில் 41 பேர் உயிரிழந்த நிலையில், பல அரசியல் தலைவர்களும் இரங்கல் தெரிவித்திருந்தனர். இந்த நிலையில், த.வெ.க. தலைவரான விஜய், இந்தத் துயரச் சம்பவம் குறித்து நேரடியாகப் பேசியுள்ளது அவரது தொண்டர்கள் மத்தியில் பெரும் தாக்கத்தை ஏற்படுத்தியுள்ளது.
