சென்னை: தமிழக காவல்துறையின் சட்டம் ஒழுங்கு பொறுப்பு டிஜிபியாக (DGP – Law & Order) வெங்கடராமன் இன்று (ஆகஸ்ட் 31) முறைப்படி பதவியேற்கிறார்.
மாநில காவல்துறையின் உயர்ந்த பதவிகளில் ஒன்றான இப்பொறுப்பை வகித்து வந்த சங்கர் ஜிவால், இன்றுடன் பணி ஓய்வு பெறுகிறார். அவரின் ஓய்வு காரணமாக, புதிய டிஜிபி நியமனம் குறித்த ஆவல் காவல்துறையினரும் அரசியல் வட்டாரங்களிலும் எழுந்தது.
பணிமூப்பு அடிப்படையில், தற்போது டிஜிபி நிலையை வகிக்கும் சீமா அகர்வால், ராஜீவ்குமார், சந்தீப் ராய் ரத்தோர் ஆகிய மூவரில் ஒருவருக்கு இப்பொறுப்பு வழங்கப்படும் என கருதப்பட்ட நிலையில், திடீரென திருப்பம் ஏற்பட்டு, நிர்வாகப் பிரிவில் பணியாற்றி வந்த வெங்கடராமனே புதிய சட்டம் ஒழுங்கு டிஜிபியாக தமிழக அரசு தேர்வு செய்துள்ளது. இன்று மதியம், சங்கர் ஜிவால் தனது பொறுப்புகளை ஒப்படைத்த பின், வெங்கடராமன் புதிய பொறுப்பில் அதிகாரப்பூர்வமாக பதவியேற்கிறார். இதற்கான உத்தரவை தமிழக அரசு வெளியிட்டுள்ளது.
#### வெங்கடராமன் யார்?
நாகப்பட்டினத்தைச் சேர்ந்த வெங்கடராமன், 1968 ஆம் ஆண்டு பிறந்தவர். 1994 ஆம் ஆண்டு ஐபிஎஸ் அதிகாரியாக தேர்வான இவர், தமிழகத்தில் பல்வேறு மாவட்டங்களில் சிறப்பாக பணியாற்றியவர். குறிப்பாக, முக்கியமான CBI மற்றும் CBCID பிரிவுகளின் தலைமைப் பொறுப்பை வகித்தும், காவல்துறை நிர்வாகப் பிரிவுகளில் பணியாற்றியும், சட்டம் ஒழுங்கு மற்றும் விசாரணைத் துறைகளில் தன்னுடைய திறமையைக் காட்டியுள்ளார்.
அரசின் பாராட்டுகளைப் பெற்ற அனுபவமிக்க அதிகாரியாக கருதப்படும் வெங்கடராமன், இனி தமிழகத்தின் சட்டம் ஒழுங்கை கவனிக்கும் தலைமைப் பொறுப்பை ஏற்கிறார். இதனால், மாநிலம் முழுவதும் சட்டம் ஒழுங்கு நிலைமைகள் வலுவாகக் கையாளப்படும் என அதிகாரிகள் நம்பிக்கை தெரிவித்துள்ளனர்.
