தமிழகத்தில் செயல்பட்டு வரும் மனமகிழ் மன்றங்களுக்கான (Recreation Clubs) உரிமம் பெறுவதற்கும் புதுப்பிப்பதற்குமான சிறப்பு கட்டணத்தை இரு மடங்காக உயர்த்தி தமிழக அரசு புதிய அரசாணை வெளியிட்டுள்ளது.
உள்துறை (மதுவிலக்கு மற்றும் ஆயத்தீர்வை) துறை வெளியிட்டுள்ள உத்தரவின்படி, மாநிலம் முழுவதும் பதிவு செய்யப்பட்டுள்ள மனமகிழ் மன்றங்களுக்கு விதிக்கப்பட்டு வந்த சிறப்பு உரிமக் கட்டணம் இனி இரு மடங்காக வசூலிக்கப்படும். புதிய கட்டண நடைமுறை உடனடியாக அமலுக்கு வருவதாகவும் தெரிவிக்கப்பட்டுள்ளது.
அரசின் வருவாயை அதிகரிப்பதோடு, உரிமம் வழங்கும் நடைமுறையை மேலும் ஒழுங்குபடுத்தும் நோக்கிலும் இந்த நடவடிக்கை மேற்கொள்ளப்பட்டுள்ளதாக அதிகாரிகள் தெரிவித்துள்ளனர்.
இந்த புதிய கட்டண உயர்வு காரணமாக, மாநிலம் முழுவதும் செயல்பட்டு வரும் ஆயிரக்கணக்கான மனமகிழ் மன்றங்கள் கூடுதல் கட்டணத்தை செலுத்த வேண்டிய நிலை உருவாகியுள்ளது. இதனால் மன்ற நிர்வாகிகளிடையே பல்வேறு கருத்துகள் எழுந்துள்ளன.
புதிய கட்டண விவரங்கள் மற்றும் உரிமம் புதுப்பிப்பு தொடர்பான வழிகாட்டுதல்கள் விரைவில் சம்பந்தப்பட்ட அதிகாரிகளால் வெளியிடப்படும் என்றும் அரசு தரப்பில் தெரிவிக்கப்பட்டுள்ளது.
