பக்ரீத் திருநாளை முன்னிட்டு, அனுமதிக்கப்பட்ட இடங்களைத் தவிர்த்து பொது இடங்களில் கால்நடைகளை வெட்ட தடை விதிக்கப்பட்டுள்ளதாக அதிகாரப்பூர்வ அறிவிப்பு வெளியாகியுள்ளது.
பொதுமக்களின் சுகாதாரம், பாதுகாப்பு மற்றும் சட்டம் - ஒழுங்கை கருத்தில் கொண்டு இந்த நடவடிக்கை எடுக்கப்பட்டுள்ளதாக அதிகாரிகள் தெரிவித்துள்ளனர். குறிப்பாக சாலைகள், திறந்தவெளி பகுதிகள் மற்றும் மக்கள் அதிகம் கூடும் இடங்களில் கால்நடை பலி செய்யக் கூடாது என்று எச்சரிக்கப்பட்டுள்ளது.
அரசு அங்கீகாரம் பெற்ற இறைச்சிக்கூடங்கள் மற்றும் உள்ளாட்சி அமைப்புகள் அனுமதி வழங்கிய குறிப்பிட்ட இடங்களில் மட்டுமே விதிமுறைகளுக்கு உட்பட்டு கால்நடை பலி செய்ய வேண்டும் என்றும் அறிவுறுத்தப்பட்டுள்ளது.
மேலும், சுற்றுச்சூழல் பாதிப்பு மற்றும் சுகாதார பிரச்சனைகள் ஏற்படாத வகையில் கழிவுகளை முறையாக அகற்ற வேண்டும் என்றும் அதிகாரிகள் தெரிவித்துள்ளனர். விதிமுறைகளை மீறுவோருக்கு எதிராக கடுமையான நடவடிக்கை எடுக்கப்படும் என்றும் எச்சரிக்கை விடுக்கப்பட்டுள்ளது.
பக்ரீத் பண்டிகையை அமைதியாகவும் பாதுகாப்பாகவும் கொண்டாட பொதுமக்கள் முழு ஒத்துழைப்பு வழங்க வேண்டும் என்று மாவட்ட நிர்வாகங்கள் கேட்டுக்கொண்டுள்ளன.
