சென்னை மாநகராட்சி எல்லைக்குட்பட்ட பகுதிகளில் அனுமதியின்றி வைக்கப்படும் விளம்பரப் பதாகைகள் (Hoardings) மற்றும் தட்டிகளுக்கான அபராதத் தொகையை ரூ.25,000 ஆக உயர்த்தி மாநகராட்சி நிர்வாகம் அதிரடி உத்தரவு பிறப்பித்துள்ளது.
கடந்த காலங்களில் நிலவிய ரூ.5,000 அபராத நடைமுறையை மாற்றி, விதிமீறல்களைக் கட்டுப்படுத்த இந்த கடுமையான நடவடிக்கை எடுக்கப்பட்டுள்ளது. மார்ச் 7, 2026 முதல் அமலுக்கு வந்துள்ள புதிய விதிமுறைகளின்படி, உரிமம் இன்றி வைக்கப்படும் அனைத்து பதாகைகளும் 'சட்டவிரோதமானவை' எனக் கருதப்பட்டு உடனடியாக அகற்றப்படும் என்றும், அதனை அகற்றுவதற்கான செலவும் சம்பந்தப்பட்ட விளம்பர நிறுவனம் அல்லது கட்டிட உரிமையாளரிடமிருந்தே வசூலிக்கப்படும் என்றும் அறிவிக்கப்பட்டுள்ளது. விளம்பரப் பதாகைகள் அதிகபட்சமாக 10 மீட்டர் உயரத்திற்கு மிகாமலும், கட்டிடங்களின் இரண்டாவது தளம் வரை மட்டுமே வைக்கப்பட வேண்டும் என்பன போன்ற கட்டுப்பாடுகள் விதிக்கப்பட்டுள்ளன.
மேலும், போக்குவரத்து நெரிசல் மற்றும் விபத்துகளைத் தவிர்க்கும் பொருட்டு, டிஜிட்டல் திரைகளில் விளம்பரங்கள் குறைந்தபட்சம் 10 வினாடிகள் அசையாமல் இருக்க வேண்டும் (Static) என்றும், முழு வீடியோ விளம்பரங்கள் வாகனப் போக்குவரத்து இல்லாத இடங்களில் மட்டுமே அனுமதிக்கப்படும் என்றும் மாநகராட்சி ஆணையர் தெரிவித்துள்ளார்.
