சென்னை: இந்தியாவின் 77-வது குடியரசு தின விழா வரும் ஜனவரி 26-ம் தேதி நாடு முழுவதும் கொண்டாடப்பட உள்ளது. தமிழக அரசு சார்பில் சென்னை மெரினா கடற்கரை காமராஜர் சாலையில் உள்ள உழைப்பாளர் சிலை அருகே இதற்கான கொண்டாட்டங்கள் நடைபெறவுள்ளன.
இதனையொட்டி, முப்படை வீரர்கள், காவல்துறையினர் மற்றும் பள்ளி, கல்லூரி மாணவர்களின் அணிவகுப்பு ஒத்திகை இன்று (ஜனவரி 19), ஜனவரி 21 மற்றும் 23 ஆகிய தேதிகளில் நடைபெறுகிறது. இதனால் மெரினா கடற்கரைச் சாலையில் போக்குவரத்து மாற்றங்கள் செய்யப்பட்டுள்ளன.
போக்குவரத்து மாற்றம் மற்றும் நேரக் கட்டுப்பாடு:
ஒத்திகை நடைபெறும் 3 நாட்களிலும் காலை 6:00 மணி முதல் காலை 9:30 மணி வரை அல்லது ஒத்திகை முடியும் வரை காமராஜர் சாலையில் போக்குவரத்து தடை செய்யப்பட்டுள்ளது.
மூடப்படும் சாலை: காமராஜர் சாலையில் உள்ள காந்தி சிலை முதல் போர் நினைவுச் சின்னம் வரை எந்த வாகனங்களும் அனுமதிக்கப்பட மாட்டாது.
அடையாறு - பாரிமுனை: அடையாறிலிருந்து காமராஜர் சாலை வழியாகப் பாரிமுனை செல்லும் வாகனங்கள், காந்தி சிலையிடம் திருப்பப்பட்டு ஆர்.கே. சாலை வழியாக மியூசிக் அகாடமி, ராயப்பேட்டை நெடுஞ்சாலை வழியாக அண்ணா சாலைக்குத் திருப்பி விடப்பட்டுள்ளன.
பாரிமுனை - அடையாறு: பாரிமுனையிலிருந்து ராஜாஜி சாலை வழியாக வரும் வாகனங்கள், ரிசர்வ் வங்கி சுரங்கப்பாதை அருகே திருப்பப்பட்டு, அண்ணா சாலை வழியாக ராயப்பேட்டை மணிக்கூண்டு, டாக்டர் ராதாகிருஷ்ணன் சாலை வழியாகத் தங்கள் இலக்கை அடையலாம்.
பஸ்கள் மாற்றம்: அண்ணா சதுக்கம் பேருந்து நிலையம் தற்காலிகமாக மூடப்பட்டு, அந்தப் பேருந்துகள் சிந்தாதிரிப்பேட்டை ரயில் நிலையம் அருகே இருந்து இயக்கப்படுகின்றன.
முக்கிய சந்திப்புகளில் கட்டுப்பாடு:
வாலாஜா சாலை, பாரதி சாலை, பெசன்ட் சாலை மற்றும் லாயிட்ஸ் சாலை ஆகியவற்றிலிருந்து காமராஜர் சாலை நோக்கி வரும் வாகனங்கள் பெல்ஸ் சாலை அல்லது ஐஸ் ஹவுஸ் சந்திப்பு நோக்கித் திருப்பி விடப்படும்.
இந்த நேரங்களில் மெரினா கடற்கரைச் சாலை வழியாகப் பயணிக்கத் திட்டமிட்டுள்ள பொதுமக்கள், மாற்றுப் பாதைகளைப் பயன்படுத்துமாறு சென்னை மாநகரப் போக்குவரத்துக் காவல்துறை அறிவுறுத்தியுள்ளது. ஒத்திகை நடைபெறும் நேரங்களைத் தவிர மற்ற நேரங்களில் போக்குவரத்து வழக்கம் போல் இயங்கும்.
