புதுடெல்லி: நாட்டின் முன்னணி விமான நிறுவனமான இண்டிகோ ஏர்லைன்ஸ் விமானச் சேவைகள், விமானப் பணியாளர் மற்றும் பைலட் பற்றாக்குறை காரணமாக கடந்த சில நாட்களாக நாடு முழுவதும் கடுமையாகப் பாதிக்கப்பட்டு, நூற்றுக்கணக்கான விமானங்கள் ரத்து செய்யப்பட்டன. இதனால் பயணிகள் பெரும் சிரமத்திற்கு ஆளாகினர்.
இந்தப் பிரச்னையில் மத்திய சிவில் விமானப் போக்குவரத்து அமைச்சகம் (MoCA) மற்றும் சிவில் விமானப் போக்குவரத்து இயக்குநரகம் (DGCA) தீவிரமாகத் தலையிட்டு, இண்டிகோ நிறுவனத்துக்குப் பல அதிரடி உத்தரவுகளைப் பிறப்பித்துள்ளது.
மத்திய அரசு விதித்த முக்கியக் கெடு மற்றும் உத்தரவுகள்:
1. பயணக் கட்டணத்தை நாளைக்குள் திரும்ப அளித்தல் (Refund)
கெடு: ரத்து செய்யப்பட்ட விமானங்களுக்கான பயணக் கட்டணம் முழுவதையும், நாளை (டிசம்பர் 7, 2025) இரவு 8 மணிக்குள் தாமதமின்றிப் பயணிகளுக்குத் திருப்பி அளிக்க வேண்டும்.
2. கட்டண உச்ச வரம்பு (Fare Cap)
இண்டிகோ விமானச் சேவை பாதிக்கப்பட்டதால், மற்ற விமான நிறுவனங்கள் விமானக் கட்டணத்தை வழக்கத்திற்கு மாறாகப் பல மடங்கு உயர்த்திய நிலையில், மத்திய அரசு உடனடியாகக் கட்டண உச்ச வரம்பை (Fare Cap) நிர்ணயித்துள்ளது.
இந்த உச்ச வரம்பை அனைத்து விமான நிறுவனங்களும் கண்டிப்பாகப் பின்பற்ற வேண்டும் என்றும், மீறினால் உடனடி நடவடிக்கை எடுக்கப்படும் என்றும் எச்சரித்துள்ளது. இந்த வரம்பு, நிலைமை சீராகும் வரை அமலில் இருக்கும்.
3. தொலைந்துபோன உடைமைகளைத் திரும்ப ஒப்படைத்தல்
விமானச் சேவைகள் ரத்து மற்றும் தாமதம் காரணமாகப் பயணிகளிடமிருந்து பிரிந்த உடைமைகளைத் தொடர்ந்து கண்காணித்து, அடுத்த 48 மணி நேரத்திற்குள் பயணிகளின் முகவரிக்கோ அல்லது அவர்கள் தேர்ந்தெடுத்த இடத்திற்கோ கொண்டு சேர்க்க வேண்டும்.
4. கூடுதல் வசதிகள்
விமான தாமதத்தால் சிக்கித் தவிக்கும் பயணிகளுக்கு உணவு, குடிநீர் மற்றும் ஹோட்டல் தங்குமிடம் உள்ளிட்ட அத்தியாவசிய சேவைகளை நிறுவனமே ஏற்பாடு செய்ய வேண்டும்.
விமானச் சேவை நெருக்கடிக்கு இண்டிகோ நிறுவனத்தின் பணியாளர்கள் மேலாண்மையில் ஏற்பட்ட குறைபாடுகளே காரணம் என்று சிவில் விமானப் போக்குவரத்துத் துறை அமைச்சர் ராம மோகன் நாயுடு குற்றம் சாட்டியுள்ளார்.
