சென்னை: தி.மு.க. தலைவர் மற்றும் தமிழக முதலமைச்சர் மு.க.ஸ்டாலின், காங்கிரஸ் முன்னாள் தலைவரும், தற்போதைய மக்களவை எதிர்க்கட்சித் தலைவருமான ராகுல் காந்தி உடனான தனது நட்பு குறித்து நெகிழ்ச்சியுடன் பேசியுள்ளார். ராகுல் காந்தி தன்னை மூத்த அண்ணனாக அழைப்பதாலேயே, தான் அவரை 'அருமைச் சகோதரர்' என்று விளிப்பதாக முதல்வர் ஸ்டாலின் தெரிவித்துள்ளார்.
ராகுலுடன் பிணைத்த பாசம்:
சென்னையில் இன்று (அக்டோபர் 27, திங்கட்கிழமை) நடைபெற்ற காங்கிரஸ் கட்சியின் நிகழ்ச்சி ஒன்றில் கலந்துகொண்டு பேசிய முதலமைச்சர் மு.க. ஸ்டாலின், தி.மு.க. - காங்கிரஸ் கூட்டணி மற்றும் இரு தலைவர்களுக்கு இடையேயான தனிப்பட்ட பாசம் குறித்துப் பேசினார்.
அவர் பேசுகையில், "நான் மற்ற அரசியல் கட்சித் தலைவர்களை எல்லாம் பேசுகின்றபோது, யாரையும் சகோதரர் என்று சொன்னது கிடையாது. ஆனால், ராகுல் காந்தியைப் பற்றி மட்டும் விளிக்கின்றபோது, 'அருமைச் சகோதரர்' என்று நான் சொல்வதுண்டு," என்று குறிப்பிட்டார்.
இதற்குக் காரணம் என்ன என்பதைத் தெளிவுபடுத்திய ஸ்டாலின், "அவர் என்னை அண்ணன், மூத்த அண்ணன் என்றுதான் அழைப்பார். எப்போது பார்த்தாலும், என்னிடம் தொலைபேசியில் பேசுகின்றபோதும் சரி, நேரடியாகப் பார்க்கும்போதும் சரி, 'மை டியர் பிரதர்' என்றுதான் சொல்வார். அந்தப் பாசத்தை என்னால் மறக்க முடியாது," என்று நெகிழ்ச்சியுடன் கூறினார்.
நாட்டின் நலனே தலையாயது:
மேலும் பேசிய முதலமைச்சர், தனிப்பட்ட உறவு கடந்து, தி.மு.க. - காங்கிரஸ் இடையேயான அரசியல் உறவு குறித்துப் பேசினார். "தனிநபரை விட நாட்டின் நலனே முதன்மையானது" என்ற தாரக மந்திரத்தாலேயே தங்கள் நட்பு உருவாகியுள்ளது என்றும் அவர் குறிப்பிட்டார்.
தி.மு.க-வும் காங்கிரஸும் கடந்த காலத்தில் வெவ்வேறு பாதைகளில் பயணித்திருந்தாலும், இப்போது நாட்டின் நலன், தமிழகத்தின் வளர்ச்சி, எல்லாவற்றுக்கும் மேலாக நாட்டின் ஒற்றுமை என்ற பாதையில் ஒன்றாகப் பயணிக்கிறோம் என்றும் ஸ்டாலின் சுட்டிக்காட்டினார்.
"கொள்கை மற்றும் அரசியலமைப்புச் சட்டத்தின் மீதுள்ள புரிதலால் வலுப்பெற்றிருக்கும் தி.மு.க. - காங்கிரஸ் உறவு, இந்தியாவின் எதிர்காலத்தைக் காக்கும் என்பதில் எந்தச் சந்தேகமும் இல்லை" என்றும் முதலமைச்சர் மு.க.ஸ்டாலின் உறுதியாகத் தெரிவித்தார்.
இரு கட்சிகளும் ஒரே கூட்டணியில் பயணிக்கும் நிலையில், இந்தக் கருத்து, வரவிருக்கும் தேர்தல்களிலும் இரு கட்சிகளின் பிணைப்பை மேலும் வலுப்படுத்துவதாக அமைந்துள்ளது.
