சென்னை: முறையாக வழக்கறிஞர் உடை (கோட்) அணியாமல் காணொலிக் காட்சி (Video Conferencing) மூலம் விசாரணைக்கு ஆஜரான வழக்கறிஞரும், பாஜக மாநிலச் செயலாளருமான அஸ்வத்தாமன் மீது சென்னை உயர் நீதிமன்றம் தாமாக முன்வந்து நீதிமன்ற அவமதிப்பு நடவடிக்கை எடுத்துள்ளது.
நாகப்பட்டினம் மாவட்டம் தலைஞாயிறு பேரூராட்சி துணைத் தலைவர் கதிரவன் முன்ஜாமீன் கோரிய வழக்கு, சென்னை உயர் நீதிமன்ற நீதிபதி கே. ராஜசேகர் முன்பு இன்று விசாரணைக்கு வந்தது.
சம்பவம் என்ன?
வழக்கறிஞர் அஸ்வத்தாமன் காணொலி வாயிலாக ஆஜரானபோது, வழக்கறிஞர்கள் கடைபிடிக்க வேண்டிய முறையான உடை அணியவில்லை. அதாவது, அவர் வழக்கறிஞர் கோட் அணியாமல் வெள்ளை சட்டை மட்டுமே அணிந்திருந்தார்.
இதைக் கண்ட நீதிபதி கே. ராஜசேகர், நீதிமன்ற நடைமுறைகள் மற்றும் கண்ணியம் ஆகியவற்றைப் பின்பற்றுவது வழக்கறிஞர்களுக்குக் கட்டாயம் என்று சுட்டிக்காட்டினார். நீதிமன்றத்தின் மாண்பைக் கருத்தில் கொண்டு, முறையாக வழக்கறிஞர் உடை அணியாமல் ஆஜரானது நீதிமன்ற அவமதிப்பாகக் கருதப்படுகிறது என்று நீதிபதி தெரிவித்தார்.
இதையடுத்து, வழக்கறிஞரும், பாஜக மாநிலச் செயலாளருமான அஸ்வத்தாமன் மீது தாமாக முன்வந்து (Suo Motu) நீதிமன்ற அவமதிப்பு நடவடிக்கை எடுப்பதாக நீதிபதி உத்தரவிட்டார். நீதித்துறையின் கண்ணியத்தைக் காக்க இந்த நடவடிக்கை எடுக்கப்பட்டுள்ளதாக நீதிமன்ற வட்டாரங்கள் தெரிவித்துள்ளன.
