**ஈரோடு:** அதிமுகவில் ஏற்பட்டுள்ள சமீபத்திய மாற்றங்களை ஒட்டி, முன்னாள் அமைச்சர் செங்கோட்டையன் தனது நிலைப்பாட்டை தெளிவுபடுத்தியுள்ளார். ஈரோட்டில் ஊடகங்களை சந்தித்த அவர், பொறுப்பிலிருந்து நீக்கியது குறித்து எந்த வித வேதனையும் இல்லையெனவும், மாறாக மகிழ்ச்சியே அளிக்கிறது எனவும் தெரிவித்தார்.
அவர் மேலும் கூறியதாவது: “ஜனநாயக முறையை பின்பற்றியிருந்தால், என்னை பொறுப்பிலிருந்து நீக்குவதற்கு முன் விளக்கம் கேட்டிருக்க வேண்டும். ஆனால் அப்படி ஏதும் செய்யப்படவில்லை. அதிமுகவில் ஒற்றுமை நிலவ வேண்டும் என்ற நோக்கத்துடன் நான் பத்து நாட்கள் காலக்கெடு வைத்து பணிகளை முன்னெடுத்து வருகிறேன். அந்தப் பணி தொடரும். கட்சியினரிடையே ஒற்றுமை உருவாக வேண்டும் என்பதே எனது நோக்கம். என்னிடம் விளக்கம் கேட்காமல் திடீரென நீக்குவார்கள் என்று நான் எதிர்பார்க்கவில்லை.”
இதனைத் தொடர்ந்து, செங்கோட்டையன், “அதிமுக ஒரு பெரிய குடும்பம். இந்தக் குடும்பத்தைச் சிதைக்காமல், அனைவரையும் ஒருங்கிணைப்பது தான் என் குறிக்கோள். அதற்கான முயற்சிகளை தொடர்ந்து செய்வேன்” என வலியுறுத்தினார்.
அதிமுக அமைப்புச் செயலாளர் மற்றும் ஈரோடு புறநகர் மேற்கு மாவட்டச் செயலாளர் பொறுப்புகளில் இருந்து விடுவிக்கப்பட்ட நிலையில், செங்கோட்டையனின் இந்தக் கருத்துகள் கட்சி வட்டாரங்களில் பரபரப்பை ஏற்படுத்தியுள்ளது.
