சென்னை: செங்கல்பட்டு மாவட்டம் வண்டலூர் அருகே அரசு பள்ளி மாணவி தொடர்பாக எழுந்த பாலியல் துன்புறுத்தல் புகாரைத் தொடர்ந்து, அதிமுக பொதுச் செயலாளர் எடப்பாடி பழனிசாமி காவல்துறையின் செயல்பாடு குறித்து கேள்வி எழுப்பியுள்ளார். அதேநேரத்தில், புகாரில் தெரிவிக்கப்பட்டபடி சம்பவம் நடைபெற்றதை உறுதிப்படுத்தும் ஆதாரம் இதுவரை கிடைக்கவில்லை என தாம்பரம் மாநகர காவல்துறை தெரிவித்துள்ளது.
கண்டிகை பகுதியில் உள்ள அரசு பள்ளியில் மாணவி தொடர்பாக புகார் பெறப்பட்டதும் உடனடியாக எஃப்.ஐ.ஆர் பதிவு செய்யப்பட்டதாகவும், மூத்த பெண் காவல் அதிகாரிகளின் மேற்பார்வையில் பெண் காவல் ஆய்வாளர் விசாரணை மேற்கொண்டதாகவும் காவல்துறை தெரிவித்துள்ளது. பள்ளி மற்றும் சுற்றுப்புறங்களில் உள்ள சிசிடிவி காட்சிகள் ஆய்வு செய்யப்பட்டதுடன், மாணவிக்கு மருத்துவப் பரிசோதனையும் நடத்தப்பட்டதாக கூறப்பட்டுள்ளது.
மேலும், மாணவியின் வாக்குமூலம், சாட்சிகளின் தகவல்கள் உள்ளிட்ட பல்வேறு ஆதாரங்கள் ஆய்வு செய்யப்பட்டதாகவும், இதுவரை புகாரில் கூறப்பட்ட சம்பவத்தை உறுதிப்படுத்தும் ஆதாரம் கிடைக்கவில்லை என்றும் காவல்துறை விளக்கம் அளித்துள்ளது. எனினும், விசாரணை தொடர்ந்து நடைபெற்று வருவதாகவும், சரிபார்க்கப்படாத தகவல்களை பகிர வேண்டாம் என்றும் காவல்துறை கேட்டுக்கொண்டுள்ளது.
இந்த நிலையில், சம்பவம் தொடர்பாக எடப்பாடி பழனிசாமி வெளியிட்டுள்ள சமூக வலைதளப் பதிவில், மாணவியின் பெற்றோர் ஊடகங்களுக்கு அளித்த பேட்டிகளை நீக்க வேண்டும் என காவல்துறை தரப்பில் கூறப்படுவதாக குறிப்பிட்டு, காவல்துறையின் செயல்பாட்டை விமர்சித்துள்ளார். புகார் தொடர்பாக முழுமையான விசாரணை நடத்தி, உண்மை வெளிக்கொண்டு வரப்பட வேண்டும் என்றும் அவர் வலியுறுத்தியுள்ளார்.
புகார் தொடர்பாக அரசியல் கட்சிகளிடையே கருத்து மோதல் ஏற்பட்டுள்ள நிலையில், காவல்துறையின் விசாரணை தொடர்ந்து நடைபெற்று வருகிறது. விசாரணையின் அடுத்தகட்ட நடவடிக்கைகள் மற்றும் அதிகாரப்பூர்வ முடிவுகள் வெளியாகிய பின்னரே சம்பவம் தொடர்பான முழுமையான நிலவரம் தெளிவாகும்.
