சென்னை: தமிழக வெற்றிக் கழகத்துக்கு ஆதரவு அளித்து வரும் தோழமை கட்சிகளின் 2-வது ஆலோசனை கூட்டம், முதல்வர் விஜய் தலைமையில் பனையூரில் இன்று நடைபெறுகிறது. இதையொட்டி கூட்டணி கட்சிகளின் தலைவர்கள் மற்றும் பிரதிநிதிகளுக்கு அழைப்பு விடுக்கப்பட்டுள்ளது.

தவெக ஆட்சி அமைக்க ஆதரவு அளித்துள்ள கட்சிகளுடன் அடுத்தகட்ட அரசியல் நடவடிக்கைகள் குறித்து ஆலோசிப்பதே இந்தக் கூட்டத்தின் முக்கிய நோக்கமாகக் கூறப்படுகிறது. குறிப்பாக, கூட்டணியின் செயல்பாடுகள், எதிர்கால அரசியல் திட்டங்கள் மற்றும் தேர்தல் சார்ந்த விவகாரங்கள் குறித்து விவாதிக்கப்படலாம் என எதிர்பார்க்கப்படுகிறது.

தவெக தலைமையில் நடைபெற்ற முதல் ஆலோசனை கூட்டம் கடந்த ஜூலை 1-ஆம் தேதி கோவளத்தில் நடைபெற்றது. அந்தக் கூட்டத்தில் காங்கிரஸ், விசிக, மதிமுக உள்ளிட்ட கட்சிகளின் பிரதிநிதிகள் பங்கேற்றிருந்தனர். இடதுசாரிக் கட்சிகள் அந்தக் கூட்டத்தில் பங்கேற்கவில்லை.

இந்த நிலையில், 2-வது கூட்டத்திற்கும் இந்திய கம்யூனிஸ்ட் மற்றும் மார்க்சிஸ்ட் கம்யூனிஸ்ட் கட்சிகளுக்கு அழைப்பு விடுக்கப்பட்டிருந்தது. ஆனால், மார்க்சிஸ்ட் கம்யூனிஸ்ட் கட்சி கூட்டத்தில் பங்கேற்காது என கே.பாலகிருஷ்ணன் ஏற்கனவே அறிவித்துள்ளார். தேர்தல் கூட்டணி குறித்து தேர்தல் நேரத்தில் முடிவு எடுக்கப்படும் என்றும் அக்கட்சி தெரிவித்துள்ளது.

இதற்கிடையில், காங்கிரஸ், விசிக, ஐயூஎம்எல் உள்ளிட்ட கட்சிகள் கூட்டத்தில் பங்கேற்க உள்ளதாக தகவல்கள் வெளியாகியுள்ளன. கூட்டணிக்கு பெயர் சூட்டுவது உள்ளிட்ட முக்கிய விவகாரங்கள் குறித்த அறிவிப்பு வெளியாகுமா என்ற எதிர்பார்ப்பும் அரசியல் வட்டாரங்களில் நிலவுகிறது.

தவெக தலைமையிலான அரசியல் கூட்டணியை அடுத்தகட்டத்திற்கு கொண்டு செல்வதில் இந்த ஆலோசனை கூட்டம் முக்கியமானதாக பார்க்கப்படுகிறது. கூட்டத்திற்குப் பிறகு கூட்டணி தொடர்பான முக்கிய முடிவுகள் மற்றும் அறிவிப்புகள் வெளியாகலாம் என எதிர்பார்க்கப்படுகிறது.