**ஈரோடு:** அதிமுக முன்னாள் அமைச்சர் மற்றும் மூத்த தலைவர் **செங்கோட்டையன்**, “நாளை மறுநாள் (செப்டம்பர் 5) எனது கருத்தை வெளிப்படையாக தெரிவிக்கிறேன்” என்று தெரிவித்துள்ளார்.
அதிமுக பொதுச் செயலாளர் எடப்பாடி பழனிசாமி, செங்கோட்டையன் இடையே அண்மைக் காலமாக கருத்து முரண்பாடு நிலவி வருகிறது. குறிப்பாக, எடப்பாடிக்கு எதிராகத் திறந்தவெளியில் அதிருப்தியை வெளிப்படுத்திய செங்கோட்டையன், சில நாட்களுக்கு முன்பு டெல்லி சென்று பாஜக தேசிய தலைவர்களை சந்தித்தது பெரும் பரபரப்பை ஏற்படுத்தியது. இந்த சந்திப்பிற்குப் பின்னரே அதிமுக–பாஜக கூட்டணியை உறுதி செய்யும் அறிவிப்பு வெளியாகியது குறிப்பிடத்தக்கது.
இதனால், செங்கோட்டையன் எடப்பாடி மீது மீண்டும் அதிருப்தியில் உள்ளார் என்ற செய்திகள் கட்சிக்குள் பரவின. இதனைத் தொடர்ந்து, ஈரோடு அருகே கோபி குள்ளம்பாளையத்தில் உள்ள தனது தோட்டவீட்டில் நேற்று (செப்டம்பர் 2) செய்தியாளர்களைச் சந்தித்த அவர், “நாளை மறுநாள் அதாவது 5ம் தேதி, என் மனதிலிருந்ததை வெளிப்படையாகச் சொல்வேன். அதுவரை பொறுமையாக இருக்க வேண்டும்” எனக் குறிப்பிட்டார்.
இந்நிலையில், இன்று (செப்டம்பர் 3) செய்தியாளர்களிடம் பேசுகையில், செங்கோட்டையன் மேலும் கூறியதாவது: “செப்டம்பர் 5ம் தேதி காலை 9 மணிக்கு கட்சி அலுவலகத்தில்தான் கூட்டத்தை நடத்துகிறேன். அப்போது எனது கருத்தைச் சொல்லி வெளிப்படுத்துவேன். அதிமுக தொண்டர்களின் உணர்வுகளையும், கருத்துகளையும் பிரதிபலிப்பேன். கட்சி நிர்வாகிகளை யாரையும் நான் தனியாக அழைக்கவில்லை. என்னுடன் வர விரும்புகிற ஆதரவாளர்கள் தாமாகவே சேர்ந்து வருகிறார்கள்” என்றார்.
செங்கோட்டையனின் இந்த அறிவிப்பு, அதிமுகவில் நிலவி வரும் உள்கட்சிக் கலகத்துக்கு புதிய திருப்பமாகக் கருதப்படுகிறது. செப்டம்பர் 5ம் தேதி அவர் வெளியிடவிருக்கும் கருத்து, கட்சியின் எதிர்கால அரசியல் நிலைப்பாட்டில் என்ன தாக்கத்தை ஏற்படுத்தும் என்பது குறித்து தமிழக அரசியல் வட்டாரங்கள் ஆவலுடன் கவனித்து வருகின்றன.
