**சென்னை:** அதிமுக யாருக்கும் அடிமையும் இல்லை, எஜமானரும் இல்லை என முன்னாள் அமைச்சர் செல்லூர் ராஜு தெரிவித்துள்ளார். அதிமுகவை ஆர்.எஸ்.எஸ் வழிநடத்துவதில் என்ன தவறு என மத்திய இணை அமைச்சர் எல்.முருகன் எழுப்பிய கேள்விக்கு, பதிலளிக்கும் விதமாக செல்லூர் ராஜு இந்த கருத்தை கூறியுள்ளார்.
சமீபத்தில் செய்தியாளர்களிடம் பேசிய மத்திய இணை அமைச்சர் எல்.முருகன், அதிமுகவை ஆர்.எஸ்.எஸ் வழிநடத்துவதில் என்ன தவறு, அது எல்லோருக்கும் தெரியும் எனத் தெரிவித்திருந்தார். இது தமிழக அரசியல் வட்டாரத்தில் பெரும் பரபரப்பை ஏற்படுத்தியது.
இதற்கு பதிலளித்த அதிமுக முன்னாள் அமைச்சர் செல்லூர் ராஜு, "அதிமுக கொள்கையில் இருந்து என்றும் வழுவாது என்பது எல்லோருக்கும் தெரியும். நாங்கள் யாருக்கும் அடிமையும் இல்லை, எஜமானரும் இல்லை. அண்ணா, பெரியார், எம்.ஜி.ஆர்., ஜெயலலிதா போன்ற தலைவர்களின் கொள்கைகளைத்தான் நாங்கள் கடைபிடிக்கிறோம். வேறு எந்த அமைப்பின் கொள்கைகளையும் நாங்கள் பின்பற்ற மாட்டோம்," என்றார்.
மேலும், "அதிமுக தனித்துவமான இயக்கம். அதை எந்த அமைப்பும் கட்டுப்படுத்தவோ, வழிநடத்தவோ முடியாது. கொள்கை ரீதியாக வேறுபட்ட கருத்துக்களை உடையவர்களின் கூட்டணியில் நாங்கள் இருக்கிறோம். ஆனால், அதிமுகவின் அடிப்படை கொள்கைகளில் எந்த மாற்றமும் இருக்காது," எனவும் அவர் திட்டவட்டமாகத் தெரிவித்தார்.
எல்.முருகனின் இந்த கருத்து பாஜக-அதிமுக கூட்டணியில் மேலும் சலசலப்பை ஏற்படுத்தியுள்ளது. கூட்டணிக்குள் ஏற்கனவே சில கருத்து வேறுபாடுகள் இருந்து வரும் நிலையில், இந்த கருத்து முக்கியத்துவம் வாய்ந்ததாக பார்க்கப்படுகிறது.
