**திருச்சி:** “போதிய ஆசிரியர்கள் இல்லாமை மற்றும் தரமான கல்வி குறைபாடு காரணமாக இந்த ஆண்டு அரசுப் பள்ளிகளில் சேரும் மாணவர்கள் எண்ணிக்கை 1.40 லட்சம் குறைந்துள்ளது,” என்று அதிமுக பொதுச் செயலாளர் எடப்பாடி கே. பழனிசாமி குற்றம்சாட்டினார்.
‘மக்களை காப்போம், தமிழகத்தை மீட்போம்’ என்ற தலைப்பில் மாநிலம் முழுவதும் பிரச்சாரம் மேற்கொண்டு வரும் பழனிசாமி, திருச்சி மாவட்டம் மணப்பாறையில் நேற்று நடைபெற்ற பொதுக்கூட்டத்தில் உரையாற்றினார்.
அவர் தொடர்ந்து பேசியதாவது:
“அதிமுக ஆட்சிக் காலத்தில் பள்ளி மாணவர்களுக்காக காலணி, புத்தகப்பை, சைக்கிள், லேப்டாப் உள்ளிட்ட பல நலத்திட்டங்கள் அறிமுகப்படுத்தப்பட்டு வெற்றிகரமாக நடைமுறைக்கு வந்தன. ஆனால், திமுக அரசு அதிகாரத்தில் வந்த பிறகு இத்திட்டங்களை காழ்ப்புணர்ச்சி காரணமாக நிறுத்திவிட்டது. மக்களுக்கு நேரடியாக பலனளித்த திட்டங்களை கைவிட்டதன் காரணமாக பெற்றோர்கள் விரக்தியடைந்துள்ளனர்.
அடுத்தமுறை அதிமுக ஆட்சிக்கு வந்தவுடன், இத்திட்டங்கள் அனைத்தும் மீண்டும் செயல்படுத்தப்படும். மக்களின் நலனில் எப்போதும் அதிமுக மட்டுமே அக்கறை கொண்டுள்ளது.
இதே நேரத்தில், இந்த ஆண்டு மட்டும் கடந்த ஆண்டுகளை விட 1.40 லட்சம் மாணவர்கள் அரசுப் பள்ளிகளில் சேரவில்லை. இதற்கு காரணம், போதிய ஆசிரியர் நியமனம் இல்லாததும், தரமான கல்வி வழங்கத் தவறியதும்தான். மாணவர்கள் அரசுப் பள்ளிகளில் இருந்து வெளியேறி தனியார் பள்ளிகளை நாடும் நிலை உருவாகியுள்ளது. இது மாநில கல்வி அமைப்புக்கே மிகப்பெரிய எச்சரிக்கைச் சின்னமாகும்,” என்றார்.
மேலும், திமுக கூட்டணிக் கட்சிகள் அதிமுக மீது பரப்பி வரும் “சிறுபான்மையினருக்கு எதிரான கட்சி” என்ற குற்றச்சாட்டை அவர் கடுமையாக மறுத்தார்.
“அதிமுக ஆட்சியில் சிறுபான்மையினருக்காக பல்வேறு திட்டங்கள் கொண்டு வரப்பட்டன. நோன்பு கஞ்சிக்கு அரிசி, ஹஜ் மானியம், ஹஜ் இல்லம் கட்ட நிதி, உலமாக்கள் ஓய்வூதியம், தேவாலயங்கள் புதுப்பிக்க நிதி உதவி, ஜெருசலேம் புனித யாத்திரை நிதி என ஏராளமான நலத்திட்டங்கள் நடைமுறைக்கு வந்தன. தமிழகம் அமைதிப் பூங்காவாக விளங்கியது. சிறுபான்மையினரும் இதனை உணர வேண்டும்.
ஆதரவு வழங்குவது, வழங்காதது உங்களது விருப்பம். ஆனால் திமுக கூட்டணி கட்சியினர் பரப்பும் அவதூறு பிரச்சாரத்தை மட்டும் நம்பிவிடாதீர்கள்,” என்றும் பழனிசாமி வலியுறுத்தினார்.
இந்த நிகழ்வில் முன்னாள் அமைச்சர்கள் தங்கமணி, சி. விஜயபாஸ்கர், தெற்கு மாவட்டச் செயலாளர் ப.குமார் உள்ளிட்டோர் பங்கேற்று பழனிசாமியுடன் மேடையில் இணைந்தனர்.
