சென்னை: கோவை அரசு மருத்துவக் கல்லூரி பட்டமளிப்பு விழாவில் தமிழக வெற்றிக் கழகத்தின் (தவெக) கட்சிப் பாடல் ஒலிபரப்பப்பட்டதற்கு பாரதிய ஜனதா கட்சியின் மூத்த தலைவர் நயினார் நாகேந்திரன் கடும் கண்டனம் தெரிவித்துள்ளார். மேலும், "கல்வி நிலையங்களை கலையரங்குகளாக மாற்ற முதல்-அமைச்சர் ஜோசப் விஜய் முயற்சிக்கிறாரா?" என்றும் அவர் கேள்வி எழுப்பியுள்ளார்.
இது தொடர்பாக அவர் வெளியிட்டுள்ள அறிக்கையில் கூறப்பட்டுள்ளதாவது:
பட்டமளிப்பு விழாவில் கட்சிப் பாடல்: கோவை அரசு மருத்துவக் கல்லூரியின் பட்டமளிப்பு விழா சமீபத்தில் நடைபெற்றது. இந்த அரசு விழாவில் தவெக அமைச்சர்களான அருண்ராஜ், சம்பத்குமார் மற்றும் விக்னேஷ் ஆகியோர் கலந்து கொண்டனர். அப்போது, மாணவர்களுக்கான பட்டமளிப்பு விழா நடக்கும் மேடையில் தமிழக வெற்றிக் கழகத்தின் பிரத்யேகப் பிரச்சாரப் பாடல் ஒலிபரப்பப்பட்டுள்ளது. அரசு நெறிமுறைகளைப் பின்பற்ற வேண்டிய ஒரு பொது நிகழ்ச்சியில் இப்படிச் செய்திருப்பது கடும் கண்டனத்திற்குரியது.
விளம்பர வெறி: ஜோசப் விஜய் அவர்கள் தமிழகத்தின் முதல்-அமைச்சராக என்று பொறுப்பேற்றுக் கொண்டாரோ, அன்றைய தினத்தில் இருந்தே விளம்பர வெறி முற்றிய தவெகவினரின் அட்டூழியங்கள் நாளுக்கு நாள் அதிகரித்து வருகின்றன. மாணவர்களின் கல்வி மற்றும் எதிர்காலம் சார்ந்த ஒரு புனிதமான நிகழ்வை, தங்களின் அரசியல் விளம்பரத்திற்கான மேடையாகப் பயன்படுத்தியிருப்பது எவ்வகையிலும் ஏற்புடையதல்ல.
மாண்பைக் கற்றுக் கொள்ள வேண்டும்: கல்வி பயிலும் இடங்களை வெறும் அரசியல் மேடைகளாகவும், கலையரங்குகளாகவும் மாற்றும் முயற்சியில் தற்போதைய அரசு ஈடுபட்டு வருகிறதா என்ற சந்தேகம் எழுகிறது. அரசுப் பணிகளிலும், பொது நிகழ்ச்சிகளிலும் எவ்வாறு நடந்து கொள்ள வேண்டும் என்ற குறைந்தபட்ச நெறிமுறைகளைக் கூட ஆளுங்கட்சியினர் இன்னும் உணராதது துரதிர்ஷ்டவசமானது. எனவே, முதல்-அமைச்சரும் அவரது அமைச்சரவை சகாக்களும் அரசு நிகழ்ச்சிகளுக்குரிய மாண்பையும், நெறிமுறைகளையும் முதலில் கற்றுக் கொள்ள வேண்டும் என்று வலியுறுத்துகிறேன்.
இவ்வாறு நயினார் நாகேந்திரன் தனது அறிக்கையில் குறிப்பிட்டுள்ளார்.
