சென்னை: "பள்ளி மாணவர்களை அரசியல் நோக்கங்களுக்காக பயன்படுத்துவதை ஒருபோதும் ஏற்றுக்கொள்ள முடியாது. மக்கள் ஆக்கப்பூர்வமான மற்றும் முன்னேற்றமான மாற்றங்களையே புதிய அரசிடம் எதிர்பார்க்கின்றனர்" என்று தேமுதிக பொதுச்செயலாளர் பிரேமலதா விஜயகாந்த் கடும் கண்டனம் தெரிவித்துள்ளார்.
இது குறித்து தேமுதிக பொதுச்செயலாளர் பிரேமலதா விஜயகாந்த் வெளியிட்டுள்ள அறிக்கையில் கூறியிருப்பதாவது:
வகுப்பறையில் அரசியல் அத்துமீறல்: "காஞ்சிபுரம் மாவட்டம், உத்திரமேரூர் அருகே உள்ள அரசுப் பள்ளியின் வகுப்பறைக்குள் பாடம் நடைபெற்றுக்கொண்டிருக்கும் நேரத்தில், தமிழக வெற்றிக் கழக (த.வெ.க) நிர்வாகிகள் அத்துமீறி நுழைந்துள்ளனர். மாணவர்களிடம் முதல்-அமைச்சர் விஜய்யின் புகைப்படத்தைக் காட்டி அவரின் பெயரைக் கேட்டுள்ளனர். மாணவர்கள் 'விஜய்' என்று கூறியதும், அதற்கு அந்த நிர்வாகிகள், 'அவர் எங்களுக்கெல்லாம் அண்ணன், உங்களுக்கு அவர் மாமா' என்று கூறியுள்ளனர்.
மேலும், 'பெரும் தலைவர்களின் புகைப்படங்கள் எங்கு உள்ளதோ, அங்கே அவர் புகைப்படத்தையும் வைக்கப்போகிறோம்' என்று கூறி வகுப்பறையிலேயே புகைப்படத்தை வைத்துள்ளனர்.
பள்ளியில் பிறந்தநாள் கொண்டாட்டம்: அதுமட்டுமல்லாமல், மற்றொரு பள்ளியில் த.வெ.க கட்சி நிர்வாகிகள் பள்ளியை ஆய்வு செய்வதாகக் கூறி உள்ளே சென்று, அங்கு நிர்வாகி ஒருவரின் பிறந்தநாளைக் கேக் வெட்டிக் கொண்டாடியதாக அதிர்ச்சியளிக்கும் தகவல்கள் வெளியாகியுள்ளன. இது போன்ற அத்துமீறல்கள் மக்களிடையே பெரும் அதிருப்தியையும் வெறுப்பையும் ஏற்படுத்தி உள்ளன.
ஏற்றுக்கொள்ள முடியாது: பள்ளிக்கூடம் என்பது மாணவர்கள் கல்வி பயிலும் புனிதமான இடம். அங்குச் சென்று பிஞ்சு மாணவர்களை அரசியல் நோக்கங்களுக்காகப் பயன்படுத்துவதையோ, வகுப்பறைகளுக்குள் கட்சி அரசியல் செய்வதையோ ஒருபோதும் ஏற்க முடியாது.
புதிதாகப் பொறுப்பேற்றுள்ள அரசிடம் மக்கள் ஆக்கப்பூர்வமான மற்றும் முன்னேற்றமான மாற்றங்களையே எதிர்பார்க்கிறார்கள். கல்வி நிலையங்களில் நடக்கும் இதுபோன்ற அத்துமீறல்களை உடனடியாகத் தடுத்து நிறுத்த வேண்டும்," என்று தனது அறிக்கையில் பிரேமலதா விஜயகாந்த் சுட்டிக்காட்டியுள்ளார்.
தமிழகத்தில் சமீபத்தில் நடந்து முடிந்த சட்டமன்றத் தேர்தலில் எதிர்பாராத திருப்பமாக த.வெ.க வெற்றி பெற்று விஜய் முதல்வராகப் பொறுப்பேற்றுள்ள நிலையில், ஆளுங்கட்சி நிர்வாகிகள் அரசுப் பள்ளிகளில் அத்துமீறிச் செயல்படுவதாக எழுந்துள்ள குற்றச்சாட்டு அரசியல் மற்றும் கல்வியாளர் வட்டாரத்தில் பெரும் சலசலப்பை ஏற்படுத்தியுள்ளது.
