தமிழக அரசியல் களத்தில் பெரும் பரபரப்பை ஏற்படுத்தும் வகையில், பா.ஜ.க-வின் முன்னாள் மாநிலத் தலைவர் கே. அண்ணாமலை கட்சியிலிருந்து அதிகாரப்பூர்வமாக விலகியுள்ளதாக தகவல்கள் வெளியாகியுள்ளன.
டெல்லியில் முகாமிட்டிருந்த அண்ணாமலை, பா.ஜ.க தேசியத் தலைவர் நிதின் நபீனை நேரில் சந்தித்து தனது விலகல் கடிதத்தை வழங்கியதாக அரசியல் வட்டாரங்களில் தகவல்கள் பரவி வருகின்றன. இதன் மூலம் கடந்த சில நாட்களாக அவரது அரசியல் எதிர்காலம் குறித்து நிலவி வந்த யூகங்களுக்கு புதிய திருப்பம் ஏற்பட்டுள்ளது.
அண்ணாமலையின் இந்த முடிவு தமிழக பாஜக வட்டாரத்தில் அதிர்ச்சியை ஏற்படுத்தியுள்ளதாக கூறப்படுகிறது. மாநில அரசியலில் தீவிரமாக செயல்பட்டு வந்த அவர், கடந்த சில ஆண்டுகளில் கட்சியின் முக்கிய முகமாக உருவெடுத்திருந்தார்.
இதற்கிடையில், அண்ணாமலை புதிய அரசியல் இயக்கம் அல்லது தனிக்கட்சி தொடங்கும் முயற்சியில் ஈடுபட்டுள்ளதாகவும் தகவல்கள் வெளியாகி வருகின்றன. எனினும், இதுகுறித்து அவர் அல்லது பாஜக தரப்பில் இதுவரை அதிகாரப்பூர்வ அறிவிப்பு எதுவும் வெளியிடப்படவில்லை.
அண்ணாமலையின் விலகல் குறித்த தகவல் உறுதிப்படுத்தப்பட்டால், அது தமிழக அரசியலில் முக்கிய தாக்கத்தை ஏற்படுத்தக்கூடிய நிகழ்வாக அமையும் என அரசியல் பார்வையாளர்கள் கருத்து தெரிவிக்கின்றனர். அவரது அடுத்த அரசியல் நகர்வு என்னவாக இருக்கும் என்பது தற்போது அரசியல் களத்தில் மிகப்பெரிய கேள்வியாக மாறியுள்ளது.
