காஞ்சிபுரம்: அதிமுக பொதுச் செயலாளர் எடப்பாடி கே. பழனிசாமி, “சினிமாவில் நடித்து, ஓய்வுபெறும் வயதில் கட்சி தொடங்கிவிட்டால் உடனே எல்லாம் கிடைக்கும் என சிலர் நம்புகின்றனர். ஆனால், அரசியலில் உழைப்பும், அனுபவமும், விசுவாசமும் இருந்தால்தான் உயர முடியும்” எனக் கூறியுள்ளார்.

‘**மக்களைக் காப்போம் – தமிழகத்தை மீட்போம்**’ என்ற தலைப்பில் மாநிலம் முழுவதும் தேர்தல் பிரச்சாரத்தை மேற்கொண்டு வரும் பழனிசாமி, இன்று காஞ்சிபுரம் ஏனாத்தூர் பகுதியில் தனியார் விடுதியில் பல்வேறு தரப்பினரை சந்தித்து உரையாடினார். இந்த சந்திப்பில், காஞ்சிபுரம் அனைத்து நெசவாளர் கூட்டுறவு சங்க கூட்டமைப்பினர், பட்டு இழை மற்றும் சரிகை விலை குறைப்பு, நெசவாளர்களுக்கு அதிக வேலைவாய்ப்பு, கோயில் நிலங்களில் வசிக்கும் குடியிருப்போருக்கு உரிய பட்டா வழங்குதல், கூட்டுறவு சங்கங்களுக்கு ஆண்டுதோறும் ரூ.50 கோடி மானியம் வழங்குதல் உள்ளிட்ட பல்வேறு கோரிக்கைகளை முன்வைத்து மனு அளித்தனர்.

### விவசாயிகள் – வணிகர்களின் குறைகள்

அதேபோல், விவசாயிகள் குழு ஒன்று, விளைபொருட்களுக்கு கூடுதல் விலை நிர்ணயித்தல், இடுப்பொருட்களை (input materials) இலவசமாக வழங்குதல், ஏரி, குளங்களை சுத்தம் செய்வது போன்ற கோரிக்கைகளை வலியுறுத்தினர். வணிகர்கள், வரி ஏற்றம் குறித்து பழனிசாமியிடம் தங்களது குறைகளை பகிர்ந்து கொண்டனர். வழக்கறிஞர்கள் உட்பட பலரும் தனித்தனியாக சந்தித்தனர்.

### பழனிசாமியின் உரை

பின்னர் குமரக்கோட்டம் பகுதியில் நடைபெற்ற பொதுக்கூட்டத்தில் பழனிசாமி பேசியதாவது:

“இப்போதெல்லாம் சினிமாவில் நடித்துவிட்டு ஓய்வுபெறும் வயதில் கட்சி தொடங்குகின்றனர். உடனே எல்லாம் கிடைக்கும் என்று நம்புகின்றனர். ஆனால், நான் 50 ஆண்டுகால அரசியல் அனுபவம் மற்றும் உழைப்பின் மூலம் படிப்படியாக உயர்ந்தவன். அதிமுகவில் மட்டுமே உழைப்பும் விசுவாசமும் இருந்தால் உயர முடியும். புதிய கட்சி தொடங்குபவர்களும் கூட, அதிமுக தலைவர்களைத் தான் உதாரணமாகக் கூறுகின்றனர். அப்படி சொல்லும் அளவுக்கு, நமது முன்னாள் தலைவர்கள் மக்கள் நலத்திட்டங்களை செயல்படுத்தியவர்கள். தமிழகத்தில் 17 அரசு மருத்துவக் கல்லூரிகளையும், 67 கலை மற்றும் அறிவியல் கல்லூரிகளையும் தொடங்கியது அதிமுக அரசு. விவசாயிகளுக்கும், நெசவாளர்களுக்கும் பல்வேறு நலத்திட்டங்களை வழங்கினோம். குடிமராமத்து திட்டத்தின் மூலம் நீர்நிலைகளை பாதுகாத்தோம்” என்றார்.

### அதிமுக ஆட்சிக்கு வந்தால்...

“அதிமுக மீண்டும் ஆட்சிக்கு வந்தால், மக்கள் மன நிறைவு பெறும் வகையில் அனைத்து நலத்திட்டங்களும் தொடரும். மாணவர்களுக்கு நிறுத்தப்பட்ட மடிக்கணினிகள் மீண்டும் வழங்கப்படும். பல லட்சம் மதிப்பில் கான்கிரீட் வீடுகள் கட்டித் தரப்படும். திருமண உதவித்திட்டம், தாலிக்கு தங்கம் வழங்கும் திட்டம் மீண்டும் செயல்படுத்தப்படும். மேலும், மணமகளுக்கு பட்டுப் புடவையும், மணமகனுக்கு பட்டு வேட்டியும் வழங்கும் திட்டமும் நிறைவேற்றப்படும்” என பழனிசாமி உறுதியளித்தார்.

இந்தக் கூட்டத்தில் முன்னாள் அமைச்சர் வைகைசெல்வன், மாவட்டச் செயலர் வி. சோமசுந்தரம், அமைப்புச் செயலர் வாலாஜாபாத் பா. கணேசன் உள்ளிட்ட பலரும் கலந்து கொண்டனர்.