புதுடெல்லி: இந்தியாவில் உள்ள அரசியல் கட்சிகள் தேர்தல் அறக்கட்டளைகள் (Electoral Trusts) வழியாகப் பெற்றுள்ள நன்கொடை குறித்த புதிய விவரங்களை ஜனநாயக சீர்திருத்தங்களுக்கான சங்கம் (ADR) வெளியிட்டுள்ளது. இதன்படி, கடந்த 2024-25 நிதியாண்டில் பல்வேறு நிறுவனங்கள் மற்றும் தனிநபர்களிடமிருந்து அரசியல் கட்சிகளுக்கு மொத்தம் 3,826.35 கோடி ரூபாய் நிதி கிடைத்துள்ளது.
இந்த மொத்த நிதியில் சிம்ம சொப்பனமாக விளங்கும் பாரதிய ஜனதா கட்சி (BJP), சுமார் 3,157.65 கோடி ரூபாயைப் பெற்றுள்ளது. இது தேர்தல் அறக்கட்டளைகள் மூலம் விநியோகிக்கப்பட்ட ஒட்டுமொத்த தொகையில் 82.52 சதவீதம் என்பது குறிப்பிடத்தக்கது. ஆளும் கட்சியான பாஜகவுக்கு அடுத்தபடியாக, நாட்டின் முதன்மை எதிர்க்கட்சியான இந்திய தேசிய காங்கிரஸ் 298.78 கோடி ரூபாயை (7.81%) நன்கொடையாகப் பெற்றுள்ளது.
மேற்கு வங்கத்தைச் சேர்ந்த திரிணாமுல் காங்கிரஸ் கட்சி 102 கோடி ரூபாயையும், மற்ற 19 அரசியல் கட்சிகள் அனைத்தும் சேர்ந்து 267.92 கோடி ரூபாயையும் பெற்றுள்ளன.
இந்த நிதியுதவியில் 'ப்ரூடென்ட்' (Prudent) என்ற தேர்தல் அறக்கட்டளை முக்கியப் பங்கு வகித்துள்ளது. இந்த ஒரே அறக்கட்டளை மட்டும் பல்வேறு நிறுவனங்களிடமிருந்து திரட்டிய 2,668.46 கோடி ரூபாயை 15 கட்சிகளுக்குப் பிரித்து வழங்கியுள்ளது. இதற்கு அடுத்தபடியாக 'ப்ரோக்ரசிவ்' (Progressive) அறக்கட்டளை 914.97 கோடி ரூபாயை வழங்கியுள்ளது.
நன்கொடை வழங்கியவர்களில் 228 கார்ப்பரேட் நிறுவனங்கள் மொத்தம் 3,636.82 கோடி ரூபாயையும், 99 தனிநபர்கள் 187.62 கோடி ரூபாயையும் வழங்கியுள்ளனர். குறிப்பாக, எலிவேட்டட் அவென்யூ ரியாலிட்டி எல்.எல்.பி (Elevated Avenue Realty LLP) நிறுவனம் அதிகபட்சமாக 500 கோடி ரூபாயை நன்கொடையாக அளித்துள்ளது. டாட்டா சன்ஸ் மற்றும் டிசிஎஸ் போன்ற முன்னணி நிறுவனங்களும் இதில் பெரும் பங்களிப்பை வழங்கியுள்ளன.
தேர்தல் பத்திரங்கள் (Electoral Bonds) முறையை உச்ச நீதிமன்றம் ரத்து செய்த பிறகு, அரசியல் கட்சிகளுக்கான நிதிப் பரிமாற்றம் தேர்தல் அறக்கட்டளைகள் வழியாகப் பன்மடங்கு அதிகரித்துள்ளதை இந்த அறிக்கை உறுதிப்படுத்துகிறது.
