புதுடெல்லி: மத்திய அரசு ஊழியர்கள் மற்றும் ஓய்வூதியதாரர்கள் சுமார் 1.2 கோடி பேரின் சம்பளம் மற்றும் படிகள் குறித்து பரிந்துரை செய்யவுள்ள 8வது ஊதியக் குழுவின் நியமனத்திற்கு மத்திய அமைச்சரவை இன்று (அக்டோபர் 28, 2025) ஒப்புதல் அளித்துள்ளது. இதன் மூலம், கடந்த பத்து மாதங்களுக்கும் மேலாக நீடித்து வந்த காலதாமதம் முடிவுக்கு வந்துள்ளது.
பிரதமர் நரேந்திர மோடி தலைமையிலான மத்திய அமைச்சரவைக் கூட்டத்தில், இந்தக் குழுவின் தலைவர் மற்றும் உறுப்பினர்களை நியமிப்பதற்கான முடிவுக்கு ஒப்புதல் வழங்கப்பட்டது. அதன்படி, உச்ச நீதிமன்றத்தின் முன்னாள் நீதிபதி ரஞ்சனா பிரகாஷ் தேசாய் அவர்கள் 8வது ஊதியக் குழுவின் தலைவராக நியமிக்கப்பட்டுள்ளார். மேலும், இந்தக் குழுவில் ஐ.ஐ.எம். பெங்களூர் பேராசிரியர் புலக் கோஷ் பகுதி நேர உறுப்பினராகவும், ஐ.ஏ.எஸ். அதிகாரி பங்கஜ் ஜெயின் உறுப்பினர்-செயலாளராகவும் நியமனம் செய்யப்பட்டுள்ளனர்.
பொதுவாக, மத்திய ஊதியக் குழுவின் பரிந்துரைகள் 10 ஆண்டுகளுக்கு ஒருமுறை அமலுக்கு வரும். அந்த வகையில், 7வது ஊதியக் குழுவின் பரிந்துரைகள் 2025 டிசம்பருடன் முடிவடைவதால், 8வது ஊதியக் குழுவின் பரிந்துரைகள் ஜனவரி 1, 2026 முதல் அமலுக்கு வரும் என்று எதிர்பார்க்கப்படுகிறது.
18 மாதங்களில் அறிக்கை:
இந்தப் புதிய ஊதியக் குழுவானது, தற்போதுள்ள சம்பளக் கட்டமைப்பு, அகவிலைப்படி மற்றும் இதர படிகளைப் பற்றி விரிவாக ஆய்வு செய்யும். நாட்டின் ஒட்டுமொத்தப் பொருளாதார நிலை, அரசின் நிதி நிலை மற்றும் பிற பொதுத்துறை/தனியார் துறைகளில் உள்ள ஊதிய விகிதங்கள் ஆகியவற்றை கருத்தில் கொண்டு, நியமிக்கப்பட்ட தேதியிலிருந்து 18 மாதங்களுக்குள் தனது பரிந்துரைகளை மத்திய அரசிடம் சமர்ப்பிக்க வேண்டும் என்று அறிவுறுத்தப்பட்டுள்ளது. இந்தக் குழுவின் நியமனம், மத்திய அரசு ஊழியர்கள் மத்தியில் பெரும் மகிழ்ச்சியை ஏற்படுத்தியுள்ளது.
