திருமலை: உலகப் புகழ் பெற்ற திருப்பதி ஏழுமலையான் கோயிலில், பக்தர்களின் ஆன்மிக சூழலை குலைக்கும் வகையில் ரீல்ஸ் எடுக்கும் செயல்களுக்கு தடைவிதிக்கப்பட்டுள்ளது. இதுபோன்ற செயல்களில் ஈடுபடுவோருக்கு எதிராக கடுமையான நடவடிக்கை எடுக்கப்படும் என்று திருப்பதி திருத்தல தேவஸ்தானம் எச்சரிக்கை விடுத்துள்ளது.
திருமலைக்கு தினமும் ஆயிரக்கணக்கான பக்தர்கள் தரிசனத்திற்காக வருகின்றனர். ஆனால் சமீப காலமாக சிலர் கோயில் முன்பகுதி, மாட வீதிகள் மற்றும் புனிதத்தைக் குறிக்கும் முக்கிய இடங்களில் மொபைல் போனில் ரீல்ஸ் எடுத்து சமூக வலைதளங்களில் வெளியிட்டு வருகின்றனர். இந்தச் செயல், அந்த இடத்தின் ஆன்மிக புனிதத்துக்கு கேடு விளைவிப்பதோடு, தரிசனத்திற்காக வரும் பக்தர்களின் மனத்தையும் புண்படுத்துவதாக தேவஸ்தானம் தெரிவித்துள்ளது.
இந்த பிரச்சினையை கட்டுப்படுத்துவதற்காக, இனி கோயில் முன்பகுதியிலும் மாட வீதிகளிலும் ரீல்ஸ் எடுப்பவர்கள் மீது நேரடியாக வழக்குப் பதிவு செய்ய உத்தரவிடப்பட்டுள்ளது. பக்தர்கள் மற்றும் சுற்றுலா பயணிகள் இந்த எச்சரிக்கையை மதித்து, புனித தலத்தின் மரியாதையை காக்க வேண்டும் என தேவஸ்தானம் கேட்டுக் கொண்டுள்ளது.
கோயிலின் பாரம்பரியத்தையும் புனிதத்தையும் பேணுவது அனைவரின் கடமை என்பதால், பக்தர்கள் மற்றும் பயணிகள் தேவஸ்தானத்தின் இந்த அறிவுறுத்தலை புரிந்து கொண்டு ஒத்துழைக்க வேண்டும் என்று மீண்டும் வலியுறுத்தப்பட்டுள்ளது.
