புதுடெல்லி: இந்திய ஜனநாயகத்தின் நம்பகத்தன்மையையும் வெளிப்படைத்தன்மையையும் மேலும் அதிகரிக்கும் நோக்கில், இந்தியத் தேர்தல் ஆணையம் (ECI) சில முக்கிய சீர்திருத்தங்களை அறிவித்துள்ளது. இந்தப் புதிய நடைமுறைகள் பீகார் சட்டமன்றத் தேர்தல்களில் அறிமுகப்படுத்தப்பட்டதைத் தொடர்ந்து, இனி வரும் அனைத்து தேர்தல்களிலும் நாடு முழுவதும் அமல்படுத்தப்படும் என்று அறிவிக்கப்பட்டுள்ளது.
வாக்காளர்களுக்கான வசதிகள், வாக்குப்பதிவு மையங்களில் வெளிப்படைத்தன்மை ஆகியவற்றை மேம்படுத்தும் வகையில் கொண்டு வரப்பட்டுள்ள இந்த புதிய நடைமுறைகளில் முக்கியமானவை சில இங்கே கொடுக்கப்பட்டுள்ளது.
வாக்காளர் மற்றும் வாக்குப்பதிவு மைய மாற்றங்கள்:
வாக்குச்சாவடிகளில் குறைந்த வாக்காளர்கள்:
ஒரு வாக்குச்சாவடியில் வாக்காளர்களின் எண்ணிக்கை 1,500 ஆக இருந்த வரம்பு தற்போது 1,200 ஆக குறைக்கப்பட்டுள்ளது. இதனால், கூட்ட நெரிசல் குறைந்து, வாக்காளர்கள் விரைவாக வாக்களிக்க முடியும்.
அனைத்து வாக்குச்சாவடிகளிலும் வெப்காஸ்டிங்:
வாக்குப்பதிவு நடைபெறும் அனைத்து மையங்களிலும் 100% இணைய வழிக் கண்காணிப்பு (Webcasting) கட்டாயமாக்கப்பட்டுள்ளது. இது தேர்தல் முறைகேடுகளைத் தடுக்கவும், வெளிப்படைத்தன்மையை உறுதிப்படுத்தவும் உதவும்.
வாக்காளர்கள் மொபைல் போன் டெபாசிட்:
வாக்குச்சாவடிக்கு வரும் வாக்காளர்கள் தங்கள் மொபைல் போன்களை டெபாசிட் செய்ய வசதி ஏற்படுத்தப்பட்டுள்ளது. வாக்குச்சாவடிக்கு வெளியே இதற்கென ஒரு தனி கவுண்டர் அல்லது அறை அறிமுகப்படுத்தப்படும்.
சாவடி நிலை அலுவலர்களுக்கு அடையாள அட்டை:
வாக்குச்சாவடி நிலை அலுவலர்களை (BLO) எளிதில் அடையாளம் காணும் வகையில், அவர்களுக்கு அதிகாரப்பூர்வ அடையாள அட்டைகள் வழங்கப்படுகின்றன.
வாக்குப்பதிவு இயந்திரம் (EVM) மற்றும் வாக்குச்சீட்டில் மாற்றம்:
EVM வாக்குச்சீட்டில் வண்ணப் புகைப்படம்: மின்னணு வாக்குப் பதிவு இயந்திரங்களில் (EVM) பயன்படுத்தப்படும் வாக்குச்சீட்டில் (Ballot Paper), வேட்பாளர்களின் வண்ணப் புகைப்படங்கள் அச்சிடப்படும். இதன் மூலம் வாக்காளர்கள் வேட்பாளர்களை எளிதில் அடையாளம் காண முடியும்.
பெரிய எழுத்துருக்கள்:
EVM வாக்குச்சீட்டுகளில் வேட்பாளர்களின் பெயர் மற்றும் வரிசை எண்களின் எழுத்துருக்கள் (Font) பெரிதாக அச்சிடப்படும்.
வாக்காளர் பட்டியலில் சேர 4 தகுதி தேதிகள்:
வாக்காளர் பட்டியலில் சேர்வதற்கான தகுதித் தேதி (Qualifying Date) ஒரு வருடத்திற்கு முன்பு இருந்ததை மாற்றி, தற்போது வருடத்திற்கு நான்கு தகுதி தேதிகள் (ஜனவரி 1, ஏப்ரல் 1, ஜூலை 1, அக்டோபர் 1) வழங்கப்படுகின்றன.
இதர முக்கிய சீர்திருத்தங்கள்:
முதியோர் மற்றும் மாற்றுத்திறனாளிகளுக்கு முன்னுரிமை: 85 வயதுக்கு மேற்பட்ட மூத்த குடிமக்களுக்கும், மாற்றுத் திறனாளிகளுக்கும் வாக்குச்சாவடிக்குள் செல்ல முன்னுரிமை அளிக்கப்படும். அவர்களுக்கு அஞ்சல் வாக்குச் சீட்டு வசதியும் (Optional Postal Ballot) நீட்டிக்கப்பட்டுள்ளது.
போலிச் செய்திகள் மீது கண்காணிப்பு: சமூக ஊடகங்களில் பரவும் போலிச் செய்திகள் (Fake News) மற்றும் வெறுப்புப் பேச்சுக்கள் மீது கடுமையான கண்காணிப்பு வைக்கப்படும் என்றும், தவறான தகவல்களைப் பரப்ப AI அடிப்படையிலான கருவிகளைப் பயன்படுத்த வேண்டாம் என்றும் அரசியல் கட்சிகளுக்கு ஆணையம் அறிவுறுத்தியுள்ளது.
EPIC அட்டை விரைவான விநியோகம்:
வாக்காளர் பட்டியலில் பெயர் மாற்றம் அல்லது புதிய பதிவு செய்த 15 நாட்களுக்குள் EPIC அட்டையை (வாக்காளர் அடையாள அட்டை) வாக்காளருக்கு விரைவாக விநியோகிக்க புதிய நடைமுறை கொண்டு வரப்பட்டுள்ளது.
இந்தியாவில் தேர்தல் நடைமுறையை மேலும் எளிதாகவும், நம்பகத்தன்மையுடனும் நடத்துவதற்கு இந்த 17க்கும் மேற்பட்ட புதிய முயற்சிகளை தேர்தல் ஆணையம் அறிமுகப்படுத்தியுள்ளது.
