மேற்கு வங்க மாநிலத்தின் டார்ஜிலிங் மலைப் பகுதிகளில் சனிக்கிழமை இரவு முதல் கொட்டித் தீர்த்த கனமழையால் பல இடங்களில் பயங்கர நிலச்சரிவுகள் ஏற்பட்டுள்ளன. இந்தத் துயரச் சம்பவங்களில் சிக்கி உயிரிழந்தவர்களின் எண்ணிக்கை 20 ஆக உயர்ந்துள்ளது. மேலும் பலர் இடிபாடுகளில் சிக்கியிருக்கலாம் என அஞ்சப்படுவதால், பலி எண்ணிக்கை மேலும் அதிகரிக்கும் என அஞ்சப்படுகிறது.
மோசமாகப் பாதிக்கப்பட்ட பகுதிகள்:
கனமழை காரணமாக டார்ஜிலிங், மிரிக், சுகியாபோக்ரி, குர்சியோங் உள்ளிட்ட பல்வேறு பகுதிகள் கடுமையாக பாதிக்கப்பட்டுள்ளன. மிரிக்-சுகியாபோக்ரி சாலையில் ஏற்பட்ட ஒரு பெரிய நிலச்சரிவில் பல வீடுகள் மற்றும் தேயிலைத் தோட்ட தொழிலாளர்களின் குடியிருப்புகள் மண்ணோடு மண்ணாகப் புதைந்துள்ளன.
பாலம் இடிந்து போக்குவரத்து துண்டிப்பு:
தொடர் மழை மற்றும் வெள்ளப்பெருக்கு காரணமாக துதியா பகுதியில் பாலசன் ஆற்றின் மீது கட்டப்பட்டிருந்த முக்கியமான இரும்புப் பாலம் ஒன்று இடிந்து விழுந்தது. இதனால், சிலிகுரி - மிரிக் இடையேயான போக்குவரத்து முற்றிலுமாகத் துண்டிக்கப்பட்டு, பல கிராமங்கள் தனிமைப்படுத்தப்பட்டுள்ளன. மிரிக் மற்றும் குர்சியோங்கை இணைக்கும் முக்கியச் சாலைகளும், தேசிய நெடுஞ்சாலைகளும் நிலச்சரிவுகளால் மூடப்பட்டுள்ளன.
மீட்புப் பணிகள்:
சம்பவம் குறித்த தகவல் கிடைத்தவுடன், தேசியப் பேரிடர் மீட்புக் குழு (NDRF) மற்றும் மாநிலப் பேரிடர் மீட்புக் குழுவினர் (SDRF) உள்ளூர் காவல்துறையினர் மற்றும் தன்னார்வலர்களின் துணையுடன் மீட்புப் பணிகளைத் தீவிரப்படுத்தியுள்ளனர். இருப்பினும், கனமழை தொடர்ந்து பெய்து வருவதாலும், நிலப்பரப்பு மிகவும் கரடுமுரடாக இருப்பதாலும் மீட்புப் பணிகள் சவாலாக உள்ளதாக அதிகாரிகள் தெரிவித்துள்ளனர். இதுவரை 40க்கும் மேற்பட்டோர் மீட்கப்பட்டுள்ளதாகத் தகவல்கள் தெரிவிக்கின்றன.
தலைவர்கள் இரங்கல்:
இந்த விபத்து குறித்து பிரதமர் நரேந்திர மோடி மற்றும் மேற்கு வங்க முதல்வர் மம்தா பானர்ஜி ஆகியோர் ஆழ்ந்த இரங்கல் தெரிவித்துள்ளனர். நிலைமையைத் தொடர்ந்து கண்காணித்து வருவதாகவும், பாதிக்கப்பட்ட மக்களுக்குத் தேவையான அனைத்து உதவிகளும் செய்யப்படும் என்றும் பிரதமர் மோடி உறுதியளித்துள்ளார். முதல்வர் மம்தா பானர்ஜி நாளை (அக்டோபர் 6) பாதிக்கப்பட்ட பகுதிகளை நேரில் சென்று ஆய்வு செய்யவுள்ளார்.
சுற்றுலாத் தலங்கள் மூடல்:
பாதுகாப்புக் காரணங்களுக்காக டார்ஜிலிங்கில் உள்ள டைகர் ஹில், ராக் கார்டன் உள்ளிட்ட அனைத்து முக்கியச் சுற்றுலாத் தலங்களும் மறு அறிவிப்பு வரும் வரை மூடப்படுவதாகப் பிராந்திய நிர்வாகம் அறிவித்துள்ளது.
நவராத்திரி விடுமுறையைக் கொண்டாட வந்திருந்த ஏராளமான சுற்றுலாப் பயணிகள் இப்பகுதியில் சிக்கித் தவிக்கின்றனர்.
நிலச்சரிவுகளால் ஏற்பட்டுள்ள சேதங்களின் முழுமையான விவரங்களை அறியும் பணி தொடர்ந்து நடைபெற்று வருகிறது.
