ஹைதராபாத்: இயக்குநர் எஸ்.எஸ். ராஜமெளலி இயக்கத்தில், நடிகர் மகேஷ் பாபு நடிக்கும் புதிய படமான 'வாரணாசி' (Varanasi) திரைப்படத்தின் டைட்டில் டீசர் வெளியீட்டு விழா ஹைதராபாத்தில் உள்ள ராமோஜி ஃபிலிம் சிட்டியில் சமீபத்தில் நடைபெற்றது. இந்த பிரம்மாண்ட விழாவில், ராஜமெளலி உணர்ச்சிவசப்பட்டுப் பேசிய சில கருத்துகள் தற்போது சர்ச்சையாக வெடித்திருப்பதோடு, அவர் மீது போலீஸில் புகாரும் அளிக்கப்பட்டுள்ளது.
தொழில்நுட்பக் கோளாறால் உணர்ச்சிவசப்பட்ட இயக்குநர்
'க்ளோப் டிராட்டர்' (Globe Trotter) என்ற பெயரில் நடைபெற்ற இந்த விழாவில், ஆயிரக்கணக்கான ரசிகர்கள் மற்றும் பிரபலங்கள் கூடியிருந்தனர். படத்தின் டைட்டில் டீசரை அகன்ற திரையில் வெளியிட முயன்றபோது, எதிர்பாராத விதமாக தொழில்நுட்பக் கோளாறு ஏற்பட்டது. இதனால் மிகுந்த கோபமடைந்த ராஜமெளலி மேடையில் பேசுகையில் தனது தனிப்பட்ட நம்பிக்கைகள் குறித்துப் பேசினார்.
அவர் கூறியதாவது:
"எனக்குக் கடவுள் நம்பிக்கை சுத்தமாகக் கிடையாது. என் அப்பா எப்போதும், 'அனுமன் நமக்குப்பின்னால் இருந்து பார்த்துக் கொள்வார், வழிகாட்டுவார்' என்று கூறுவார். இப்போதைய இந்தத் தொழில்நுட்பக் கோளாறைப் பார்த்தால், இப்படித்தான் பார்த்துக் கொள்வாரா? இதை நினைத்தால் எனக்குக் கோபம் வருகிறது."
அவர் மேலும் தனது மனைவி மீதும் கோபம் கொண்டதாகத் தெரிவித்தார்.
அனுமன் குறித்துப் பேசியதற்கு எதிர்ப்பு
ராஜமெளலி தனது விரக்தியில், கடவுள் நம்பிக்கை இல்லாதது குறித்துப் பேசியதும், குறிப்பாகச் சில வார்த்தைகளைப் பயன்படுத்தியது இந்து மத உணர்வுகளைப் புண்படுத்துவதாகச் சமூக வலைத்தளங்களில் கடும் கண்டனங்கள் எழுந்தன.
போலீஸில் புகார் பதிவு
இதையடுத்து, 'வானர சேனா' (Vanara Sena) என்ற அமைப்பு, ராஜமெளலியின் இந்தக் கருத்துக்கள் இந்துக்களின் மத உணர்வுகளைப் புண்படுத்தியதாகக் கூறி, ஹைதராபாத்தில் உள்ள சரூ நகர் காவல் நிலையத்தில் இன்று (நவம்பர் 18) எழுத்துப்பூர்வமாகப் புகார் அளித்துள்ளது.
போலீஸ் அதிகாரிகள், புகார் பெறப்பட்டதை உறுதி செய்துள்ளதாகவும், எனினும் இதுவரை வழக்கு எதுவும் பதிவு செய்யப்படவில்லை என்றும், புகாரில் உள்ள அம்சங்கள் குறித்து விசாரணை நடத்தப்பட்டு வருவதாகவும் தெரிவித்துள்ளனர்.
'பாகுபலி', 'RRR' போன்ற இதிகாசத் தழுவல் படங்களை இயக்கிய ராஜமெளலியே கடவுள் நம்பிக்கை குறித்து இத்தகைய கருத்தைத் தெரிவித்திருப்பது திரையுலக வட்டாரத்தில் பரபரப்பை ஏற்படுத்தியுள்ளது.
