நடிகை த்ரிஷா கிருஷ்ணனுக்கு விரைவில் திருமணம் நடைபெறவிருப்பதாக இணையத்தில் தகவல் தீயாகப் பரவிய நிலையில், அது குறித்து அவர் தனது சமூக ஊடகப் பக்கத்தில் வெளியிட்ட பதிவு ஒன்று பெரும் கவனத்தைப் பெற்றுள்ளது.
தென்னிந்திய சினிமாவின் முன்னணி நடிகையான த்ரிஷா, கடந்த 22 ஆண்டுகளாக திரையுலகில் வெற்றிகரமாகப் பயணித்து வருகிறார். அவர் இதுவரை திருமணம் செய்துகொள்ளவில்லை என்பதால், அவரது திருமணம் குறித்த வதந்திகள் அவ்வப்போது கிளம்புவது வாடிக்கையாக உள்ளது.
பரவிய வதந்தி:
சமீபத்தில், சண்டிகரைச் சேர்ந்த ஒரு தொழிலதிபருக்கும் த்ரிஷாவுக்கும் திருமணம் நிச்சயம் செய்யப்பட்டுள்ளதாகவும், இரு குடும்பத்தாருக்கும் இடையே நீண்டகாலப் பழக்கம் இருப்பதால் விரைவில் இந்தத் திருமணம் குறித்த அதிகாரப்பூர்வ அறிவிப்பு வெளியாகும் என்றும் செய்திகள் தீவிரமாகப் பரவின.
த்ரிஷாவின் பதிலடி:
இந்தத் திருமண வதந்திகள் சமூக ஊடகங்களில் பரபரப்பாகப் பேசப்பட்ட நிலையில், நடிகை த்ரிஷா தனது இன்ஸ்டாகிராம் 'ஸ்டோரி' மூலம் அதற்கு முற்றுப்புள்ளி வைத்துள்ளார்.
அந்தப் பதிவில் அவர், "என்னுடைய வாழ்க்கையை மற்றவர்கள் திட்டமிடுவதை நான் விரும்புகிறேன். அவர்கள் தேனிலவுக்கான (Honeymoon) தேதியையும் திட்டமிடுவதற்காகக் காத்திருக்கிறேன்" என்று கேலியாகவும், கூர்மையாகவும் பதிலளித்துள்ளார்.
நடிகை த்ரிஷாவின் இந்த நகைச்சுவையான பதிலடி, திருமண வதந்திகள் குறித்து வெளியான அனைத்துத் தகவல்களும் ஆதாரமற்றவை என்பதை உறுதிப்படுத்தியுள்ளது. தற்போதைக்கு அவர் தனது திரை வாழ்க்கையில் மட்டுமே முழு கவனம் செலுத்தி வருகிறார்.
