இந்திய தனித்துவ அடையாள ஆணையம் (UIDAI) ஆதார் பதிவு மற்றும் அப்டேட் சேவைகளுக்கான கட்டணங்களை உயர்த்தி அறிவித்துள்ளது. இந்த மாற்றப்பட்ட கட்டணங்கள் அக்டோபர் 1, 2025 முதல் அமலுக்கு வந்துள்ளன.
புதிய கட்டணங்கள் இரண்டு கட்டங்களாகச் செயல்படுத்தப்படும் என்று UIDAI அறிவித்துள்ளது.
முதல் கட்ட கட்டணங்கள் (அக்டோபர் 1, 2025 முதல் செப்டம்பர் 30, 2028 வரை)
இந்தப் புதிய கட்டணங்கள் அடுத்த மூன்று ஆண்டுகளுக்குச் செயல்படும்.
பயோமெட்ரிக் அப்டேட் கட்டணம்: கைரேகை, கருவிழி மற்றும் புகைப்படம் போன்ற பயோமெட்ரிக் விவரங்களை அப்டேட் செய்வதற்கான கட்டணம் ரூ.100-லிருந்து ரூ.125 ஆக உயர்த்தப்பட்டுள்ளது.
டெமோகிராஃபிக் அப்டேட் கட்டணம்: பெயர், முகவரி, பிறந்த தேதி, பாலினம் போன்ற டெமோகிராஃபிக் விவரங்களை மட்டும் தனியாக அப்டேட் செய்வதற்கான கட்டணம் ரூ.50-லிருந்து ரூ.75 ஆக உயர்த்தப்பட்டுள்ளது.
பயோமெட்ரிக் அப்டேட்: சலுகைகளும் தள்ளுபடிகளும்
பயோமெட்ரிக் அப்டேட் கட்டணங்கள் உயர்த்தப்பட்ட போதிலும், சில குறிப்பிட்ட பிரிவினருக்கு அவை இலவசமாகத் தொடர்ந்து வழங்கப்படுகின்றன:
கட்டாய இலவச அப்டேட்: 5 முதல் 7 வயதுக்கு உட்பட்ட குழந்தைகளுக்கான முதல் கட்டாய பயோமெட்ரிக் அப்டேட் மற்றும் 15 முதல் 17 வயதுக்கு உட்பட்ட டீனேஜர்களுக்கான முதல் கட்டாய பயோமெட்ரிக் அப்டேட் ஆகியவை கட்டணம் இல்லாமல் தொடரும்.
தள்ளுபடி அறிவிப்பு: நிலுவையில் உள்ள கட்டாய பயோமெட்ரிக் அப்டேட்களை (Mandatory Biometric Update - MBU) விரைந்து முடிக்கும் நோக்கில், 7 முதல் 15 வயதுக்கு உட்பட்ட குழுவினருக்கான பயோமெட்ரிக் அப்டேட் கட்டணத்தை செப்டம்பர் 30, 2026 வரை UIDAI தள்ளுபடி செய்துள்ளது. இந்தப் பிரிவினருக்கு இந்த காலக்கெடு வரை அப்டேட் இலவசமாகச் செய்து தரப்படும்.
இரண்டாம் கட்ட கட்டணங்கள் (அக்டோபர் 1, 2028 முதல் செப்டம்பர் 30, 2031 வரை)
2028-ஆம் ஆண்டு அக்டோபர் 1-ஆம் தேதி முதல் மேலும் கட்டணங்கள் உயர்த்தப்பட உள்ளன.
பயோமெட்ரிக் அப்டேட் கட்டணம்: இந்தக் காலக்கட்டத்தில் பயோமெட்ரிக் அப்டேட் செய்வதற்கான கட்டணம் ரூ.125-லிருந்து ரூ.150 ஆக மேலும் அதிகரிக்கப்படும்.
டெமோகிராஃபிக் அப்டேட் கட்டணம்: டெமோகிராஃபிக் அப்டேட் கட்டணம் ரூ.75-லிருந்து ரூ.90 ஆக உயரும்.
குறிப்பு: புதிய ஆதார் பதிவு செய்வதற்கு எக்காலத்திலும் கட்டணம் இல்லை. அது இலவசமாகவே தொடரும் என UIDAI தெரிவித்துள்ளது.
